OLOSAPO 22 - Embimbiliya - Bíblia Sagrada em Umbundu

¹ Onduko yiwa ya velapo, ukuasi wa lua u sule, oluhimo luwa lua velapo, opalata yi sule, ndaño ulu.

² Olohuasi lolosuke vi likongela pamosi, usovoli wavio viosi Yehova.

³ Omunu wa lunguka o mõla ũvi kuenje o lisalamisa; omunu wa kamba olondunge enda ño kuenje o yambuka.

⁴ Onima yumbombe lusumba wa Yehova, ukuasi lesumbilo lomuenyo.

⁵ Olosongo lolonjanjo vi kasi vonjila yukuahuku; u o lilava o kala lavio kupãla.

⁶ Pindisa omõla vonjila yo sesamẽla, eci a kula ka yapukamo vali.

⁷ Ohuasi yi viala olosuke; ukuakulevala o linga upika wu u levalisa.

⁸ U o waya evĩho ungula ohali, kuenje ombueti yonyeño yaye yi tokoka.

⁹ Ukuacali o sumũlũha, momo ukuakuavela olombolo viaye kolosuke.

¹⁰ Tundisa ukuemande kuenje uyaki u tundavo, okuliyenja lakovo ku liweka kuenda epembe.

¹¹ U o sole onjelo yutima haeye ukuakuvangula lutate, eye o linga ekamba liosoma.

¹² Ovaso a Yehova a lava lava ukũlĩhiso, puãi o lembuisa olondaka viukuelimbi.

¹³ Ukuawesi hati, Posamua peli ohosi. Volokololo ndiwa.

¹⁴ Omẽla welãsãla okueve kua longa, undeti Yehova a temela o famo.

¹⁵ Vutima womõla muli esanda, ombueti yelungulo puãi yi li sandola.

¹⁶ U o liyukinyila ukuasi waye kolosuke, pamue ecaeca kolohuasi, o mõla lika usuke.

¹⁷ Vongola etui liove, yevelela olondaka violonoño; tiamisa utima wove kolondunge viange,

¹⁸ momo ciwa nda o kala lavio vutima wove, nda viosi vika vomẽla wove.

¹⁹ Nda ku vi sapuila ove etali okuti ekolelo liove li kala ku Yehova.

²⁰ Sia ku sonẽhelele hẽ olondaka akui atatu vialungulo luloño?

²¹ Siu ku longisa hẽ eci cesunga leci cocili, okuti o kumbulula ciwa ava va ku tuma?

²² Ku ka punde osuke, momo osuke ale; ku ka vokiye ohali kukuahali o kasi kombundi.

²³ Momo Yehova o va tundila olunda, ha nyõli ovimuenyo viava va va nyõla.

²⁴ Ku ka linale lukuanyeño; ku ka ende kumosi lukuakufungula,

²⁵ sanga ovitua viaye viu ku ika, kuenje o likueka vonjanjo.

²⁶ Ka ka linge ndava va sole oku likumanyaila olondevali, haivo va kapa kapa olonjeke polofuka.

²⁷ Nda ku kuete eci o feta, nye va ku tambuila ula wove?

²⁸ Ku ka sondolole ulilo wonahũlũlua, una olosekulu viove via kapele.

²⁹ O lete ulume o kuete ombili kupange waye? Eye o ka talama kovaso olosoma, ka ka talama kovaso omanu vaño.