OLOSAPO 20 - Embimbiliya - Bíblia Sagrada em Umbundu

¹ Vinyu ohembi. Casa onjuela. Lu wa yuliwa lavio ka kuete olondunge.

² Ocikumbiti cosoma ca soka ndokukumbakumba kuohosi; u o wengula onyeño yaye o pesela omuenyo waye.

³ Ca posokela omunu oku yuvula uyaki, aveke puãi va sole oku liyenja la vosi.

⁴ Ukuawesi ka lima lima kondombo, poku ungula o vanjiliya ño, lacimue a kuete.

⁵ Uloño vutima womunu ovava a longa, puãi ukualondunge upamo.

⁶ Omanu valua va tukola, u ohenda yaye, u ohenda yaye, helie puãi wa la sanga omunu ukuekolelo lia miuha?

⁷ Ukuesunga endela vesunga liaye, omãla vaye vo kuama va sumũlũha.

⁸ Osoma yi tumãla komangu yekanga, kuenje lovaso aye yi limbuka eci cĩvi.

⁹ Helie o linga hati, Nda yelisa utima wange, haime nda yelisua kekandu liange?

¹⁰ Olomesaliso veliaño lolonjongo viesanda, kavali kavio vi kokisa Yehova ocinyuañi.

¹¹ Ndaño omõla o limbukiwa kovilinga viaye, nda upange waye wa sunguluka haiwo wocili.

¹² Etui li yeva yeva kuenda iso li vanja vanja, Yehova wa a lulika, kavali kao.

¹³ Ku ka sole otulo sanga o mõla usuke, patulula ovaso kuenje o mõla okulia ku tẽla.

¹⁴ Cĩvi, cĩvi, oco ca popia u o landa, eci a tunda puãi o lisivaya laco.

¹⁵ Ulu wa lova, olomota via liwewa, puãi omẽla wa loñoloha owo ukuasi wa posoka.

¹⁶ Kuata onanga yu wa likapela uvangi wukombe. Muẽle a linge onjeke nda wa likapela uvangi wukualofeka.

¹⁷ Ombo yeliaño tete yi sõsa, puãi noke omẽla yi yuka ohalakata.

¹⁸ Ovina viosi via sokiyiwa vi kolisua lelungulo; ovita vi yakiwe lalungulo a vakualondunge.

¹⁹ Ukuakupitisa olombonde o limbulula viuyombeki, oco ku ka linale lomunu o kuete omẽla wa lua.

²⁰ Nda umue o tuka isiaye pamue inaye, ovela yaye yima pokati kowelema wa lua.

²¹ Ocipiñalo coku tambula ño longusu kefetikilo, kefulilo liaco ka ci sumũlũha.

²² Ku ka linge huti, Fetuluinya ũvi. Imba ovaso ku Yehova kuenje eye o ku ohela.

²³ Yehova o nyale oseteko yesanda; omesaliso yeliaño ka ya sungulukile.

²⁴ Olomãi viomunu vi songuiwa la Yehova, oco hẽ, omunu o kũlĩha ndati onjila yaye?

²⁵ Omunu oku popia lonjanga hati, Ci kola, pamue oku likuminya osimbu ka sokoluile, kavali kavio via linga olonjanjo.

²⁶ Osama yi kuete olondunge yi pekula olondingaĩvi, ha pitisa elola kokuavo.

²⁷ Utima womunu ovela ya Yehova, haiwo u lengosola cosi ci kasi vokati.

²⁸ Ohenda locili vi vetatela osoma. Omangu yaye yi kolisiwa lesunga.

²⁹ Ulamba wakuenje olõhõlo viavo, puãi eposo liakulu owele wavo.

³⁰ Olosikote vi lemeha vi yelisa eci cĩvi; olombole vi yelisa vokati kutima.