OLOSAPO 2 - Embimbiliya - Bíblia Sagrada em Umbundu

¹ Amõlange, nda o tava kolondaka viange, loku seleka vutima ovihandeleko viange,

² okuti o vonguila etui liove kolondunge, loku tiamisa utima wove kuloño,

³ ocili, nda o sandiliya ukũlĩhĩso, loku lipilikila uloño,

⁴ nda o vi sanda sanda ndeci va sanda sanda opalata kolomina, kuenda o vi vanjiliya ndeci va vanjiliya ukuasi wa selekiwa,

⁵ oco o kũliha oku sumbila Yehova, kuenje o sanga ukũlĩhiso wa Suku.

⁶ Momo Yehova eye ukuakueca olondunge. Vomẽla waye mu tunda tunda ukũlĩhiso luloño.

⁷ O solekela ava va sunguluka olondunge viocili, haeye ombindikiyo yolondingesunga.

⁸ O lava lava olonjila viesunga. O vetatela onjila yolondingesunga viaye.

⁹ Oco o limbuka esunga locili kuenda eci ca sunguluka, onjila yosi yiwa,

¹⁰ Momo olondunge viñila vutima wove, kuenje uloño u sanjuisa omuenyo wove.

¹¹ Utate u ku silamẽla. Olondunge vi ku lava lava,

¹² ha vi ku popela konjila yevĩho, kuenda kokuava va popia popia esanda,

¹³ haivo va pambuka kolonjila via suñama, ha va endela volonjila viowelema;

¹⁴ haivo va sanjukila oku linga ca vĩha, va yolela okutatama kuevĩho.

¹⁵ Olonjila viavo via penga, okuenda kuavo ka kua suñamele.

¹⁶ Ove o popeliwa kelãsãla, kuenda kocipuepue cukombe ci popia popia ombambe,

¹⁷ haico ca sia ekamba liaye liokutila, loku ivalako ovisila via Suku yaye.

¹⁸ Momo onjo yaye ya petamẽla kokufa, olonjila viokonjo yaye vi loña konjembo.

¹⁹ Lomue enda kokuaye o tiuka, ndaño oku wila vali volonjila viomuenyo ka wilamo.

²⁰ Oco ove wendaila vonjila ya vakuacili, o kakatela volonjila violondingesunga.

²¹ Momo vakuesunga va tunga vofeka, Vakuacili va tumalamo.

²² Vakuakandu puãi va tundisua vofeka, kuenda vakuosuanji va veyuiwamo.