OLOSAPO 19 - Embimbiliya - Bíblia Sagrada em Umbundu

¹ Osuke yendela vesunga liaye eye wa velapo, ukuelimi liuhembi, haeye eveke, o sule.

² Omunu oku kamba ukũlĩhiso haciwako; lu enda lolupesi o lueya onjila.

³ Eci uveke womunu u u nyõla oco o funguila Yehova.

⁴ Ukuasi u luisa akamba, osuke puãi yi yandulukiwa lekamba liaye.

⁵ Ombangi yesanda ka yi puluka eyambulo; ukuakupopia uhembi ka puluka muẽle.

⁶ Va lua va livondela ekope, vosi va sole ukuaviali.

⁷ Osuke ya suvukiwa la vamanjaye vosi, ca piãla vali okuti akamba vaye vo yanduluka, o va kuama kuama lolondaka puãi kaveko.

⁸ U o sanga olondunge o sole omuenyo waye, u o patekela uloño o mõla esumũlũho.

⁹ Ombangi yesanda ka yi puluka eyambulo; ukuakupopia uhembi o nyõlẽha.

¹⁰ Elau ka li sesamẽla eveke, ca piãla enene, upika ka sesamẽla oku viala olombuale.

¹¹ Olondunge viomunu vi kandangiya onyeño yaye, ulamba waye oku siluila ũvi vo linga.

¹² Onyeño yosoma ya soka ndokukumbakumba kuohosi, ocame caye ci kasi ndowume kowangu.

¹³ Omõla wa kamba olondunge o talaisa so yaye ohali; ovikẽlũ viukãi via lisoka latosi a loka loka ño-o.

¹⁴ Onjo lukuasi ovio ocipiñalo colosekulu, puãi ukãi o kuete olondunge eye wa eciwa la Yehova.

¹⁵ Enyoño li koka otulo tua lua, ukuawesi o sanga elambu.

¹⁶ Ukuakulava ocihandeleko o popela omuenyo waye; u o huka huka kolonjila viaye o fa.

¹⁷ U o linga olosuke ohenda wondika Yehova, kuenje Yehova u tiuwila oviali viaye.

¹⁸ Pindisa omõlove osimbu kuli elavoko, ku ka tave okuti o nyõleha.

¹⁹ Ukuacikumbiti o sanga ovimbu, ndaño wo popela haimo o vokiyako.

²⁰ Yevelela alungulo, tava koku longiwa, oco o lunguke kefulilo lioloneke viove.

²¹ Vutima womunu mu tunda ovisimilo via lua, puãi ocipango ca Yehova oco ci tumãla.

²² Ci sukiliwa komunu ceci, Uwa. Osuke ya velapo ohembi.

²³ Okusumbila Yehova ku songola komuenyo. U o kasi lakuo o kala lesanju, cĩvi ka cu sangi.

²⁴ Ukuawesi o yava eka velonga, kuenje ka tava oku li tuala vali komẽla.

²⁵ Veta ukuemande kuenje aveke va lunguka; lungula ukualondunge kuenje o liupilako uloño.

²⁶ U o lingisa isiaye, pamue o lupula inaye, eye omõla o nena osõi lepembe.

²⁷ Amõlange, nda o liweka oku yeva oku longiwa cu kupa kolondaka viukũlĩhiso.

²⁸ Ombangi yesanda yi fuanguila esunga; omẽla wondingaĩvi wina ño evĩho.

²⁹ Episo lia sokiyiwila vakuemande, lolohava kolonyima viaveke.