OLOSAPO 18 - Embimbiliya - Bíblia Sagrada em Umbundu

¹ U wa liamuha lavakuavo o lisandaila ovina viaye muẽle, ha funguila cosi ca sunguluka.

² Eveke ka li sole olondunge, te oku lekisa utima waye.

³ Pa iñila ũvi pa iñilavo epembe; pa iñila emande pa iñilavo osõi.

⁴ Olondaka viomẽla womunu ovava longa; ono yolondunge olui lu pita pita.

⁵ Oku amẽla ondingaĩvi hakuwako; oku pengisa ukuesunga kekanga haico.

⁶ Olondaka vievekevikoka uyaki; omẽla waye u-u totisa olombole.

⁷ Omẽla weveke u-u nyõla, olondaka viaye viu lingila onjanjo.

⁸ Olondaka viocisokui via soka ndovilia vi pepa, viñila muẽle toke vokati kimo.

⁹ Ukuepipi kupange, eye manja ocisandui.

¹⁰ Onduko ya Yehova ocikolo ca pama, ukuesunga o tililamo ha koki.

¹¹ Huasi ombonge yaye ukuasi waye, wa soka ndocimbaka ca lepa cu vetatela.

¹² Kovaso yepela ku iya oku nyõlẽha, kovaso yumbombe ku iya esumbilo.

¹³ Nda umue o kumbulula osimbu ka yevele ciwa, wa linga uveke kuenje cu kutisa osõi.

¹⁴ Utima wa pama u tẽla kolongembia vietimba, utima wa petama puãi helie u tẽla?

¹⁵ Utima wa lunguka u kuata kuata olondunge; etui liukualondunge li sanda sanda uloño.

¹⁶ Ombanjaile yomunu yu wamẽla, yu pitilisa toke kakope.

¹⁷ U wa livanga londaka yaye o mõlẽha ndukuesunga toke ukuavo iya oku u moñolola.

¹⁸ Ocela cimũla olonatoma, haico ci tetela onimbu omanu vanene va likuetele ondaka.

¹⁹ Ukuẽle wa kuatisiwa wa soka ndombonge ya pama, okuliyenja ku kapa ongumbo.

²⁰ Imo liomunu li kuta epako liomẽla waye; o kutisua lonima yomẽla waye.

²¹ Okufa lomuenyo vi kasi vunene welimi; vosi va li sole va lia kepako lialio.

²² U wa sanga ukãi wa sanga esumũlũho, wa sangavo uwa ku Yehova.

²³ Osuke yi lipilikila ohuasi, puãi ohuasi yi tambulula lukãlu.

²⁴ Kuli akamba va liluvikiya ño ndakamba, puãi kuli ekamba li ku lamelela okuti huvove o sule.