OLOSAPO 17 - Embimbiliya - Bíblia Sagrada em Umbundu

¹ Okambu ka kola kumue lombembua ka sunguluka, onjo yeyuka lovilia kumue luyaki, ci sule.

² Upika o kuete olondunge o tumila omõla a cime caye, nda omõlaco ocisandui, haeye o litepela la vamanjaco ocipiñalo.

³ Opalata oku yeveya, ulu oku totala, kuenje Yehova o pataisa itima.

⁴ Omunu ũvi o tava kolondaka viesanda; ohembi yi yevelela kelimi lĩvi.

⁵ U o fuanguila osuke o savula usovoli waye. U o sanjukila ohali yukuavo ka yovoka.

⁶ Ocifuto cakulu olonekulu viavo; eposo liomãla olosekulu viavo.

⁷ Olondaka viesunga ka vi lavokaiwa keveke, ca piãla, olondaka viuhembi ka vi sesamela ombuale.

⁸ Ovitukiko via linga ndosilo ku wa vi eca, kuosi a enda o sumũluha.

⁹ U ecela ongole o sanda ocisola, puãi ukualombonde o liamuha lekamba liaye.

¹⁰ Okulonga ku yevala ca velapo kukualondunge, ocita colombole keveke ci sule.

¹¹ Ukuamanya o sanda lika uyaki, oco vo tumisa omunga ya tema.

¹² Oku ñualehela longue ya nyehiwa omãla vayo, hise, oku ñualehela leveke luveke walio, ũvi waco wa kãla.

¹³ Nda umue o fetuluinya uwa lũvi, ũvi ka u tundi konjo yaye.

¹⁴ Okufetika uyaki kua soka loku papula ovava, oco liwekiko osimbu okuliyenja ka kua fetikile.

¹⁵ U o yovuisa ondingaĩvi lu o pisa ondingesunga, kavali kavo Yehova o va nyale.

¹⁶ Peka liaveke pa kalela nye olombongo vioku landa olondunge, lutima ka kuete pua?

¹⁷ Ekamba li sola olonjanja viosi, kuenje li linga manjove koloneke viohali.

¹⁸ U wa kamba olondunge o likuminya lonjanga, kuenje o likapa uvangi kovaso ukuavo.

¹⁹ U o sole uyaki o sole ovama, lu o lepisa ombundi yaye o sanda oku nyõlẽha.

²⁰ Ukuotima welimbi ka sangi uwa; tikuelimi liuhembi o mõla ongongo.

²¹ Omõla eveke eye esumuo lia so yaco; so yocitumbefe ka kuete esanju.

²² Utima wa sanjuka ovihemba viwa; utima wa nyumãla u kukutisa akepa.

²³ Ondingaĩvi yi tambula ocitukiko, ha pengisa olonjila viesunga.

²⁴ Ukuoloño imba ovaso kocimaho colondunge, eveke puãi limba ovaso aye kuosi kasukiyo olofeka.

²⁵ Omõla eveke eye esumuo lia so yaco, haeye ondulu ya inaye wo cita.

²⁶ Oku fetisa ukuesunga ovimbu kaciwako; oku tipula olombuale via sunguluka hesungako.

²⁷ Ukuakukandangiya olondaka viaye eye wa lunguka; u wa tula utima eye ukualondunge.

²⁸ Ndaño eveke nda li uha li tendiwa ndukualondunge; eci a muniha komẽla, vati, Wa lunguka.