OLOSAPO 15 - Embimbiliya - Bíblia Sagrada em Umbundu

¹ Etambululo liombembua li tulumũla ocikumbiti, ondaka ya kãla puãi yi wengula onyeño.

² Elimi liukualondunge li sandeka uloño, puãi ovimẽla viaveke vi popia popia esanda.

³ Ovaso a Yehova a lete kuosi, a lavulula olondingaivi lolondingesunga.

⁴ Elimi liumbombe uti womuenyo, puãi olondaka via kãla vi teya utima.

⁵ Eveke li tomba alungulo a isiaye puãi u o tava koku lemeliwa o lekisa utate.

⁶ Vonjo yondingesunga muli ovikuata via lua, ukuasi wondingaĩvi puãi u sakalaisua.

⁷ Omẽla wukualondunge u sandeka ukũlĩhiso, omẽla weveke puãi hacoko.

⁸ Yehova o nyale ovilumba violondingakandu, puãi ohutililo yukuesunga oyo a sole.

⁹ Yehova o nyale onjila yolondingaĩvi; o sole u o kuama esunga.

¹⁰ U o pambuka vonjila o sanga eyambulo lia kãla, u o suvuka alungulo o fa.

¹¹ Onjembo lokalunga vi molẽha kovaso a Yehova, ka ca piãlele hẽ ovitima viomanu?

¹² Ukuemande ka sole oku vetisua evelo, ka endi kukualondunge.

¹³ Utima wa sanjuka u posuisa ocipala, puãi utima wa sumua u honguisa omuenyo.

¹⁴ Utima wukualondunge u sandiliya uloño, puãi omẽla weveke weyuka uveke.

¹⁵ Omumbe yi sumua sumua ño oloneke viosi; ukuotima wa sanjuka o lialia elau.

¹⁶ Citito kumue lesumbilo lia Yehova, ca velapo; ukuasi wa lua kumue lohele, ci sule.

¹⁷ Ombelela yamẽla kumue locisola, ya velapo; ositu yongombe ya neta kumue lesuvu, yi sule.

¹⁸ Ukuanyeño o sanomola ovaima, u puãi o livala konyeño o tulumũla uyaki.

¹⁹ Onjila yukuawesi ye yuka olosongo; onjila ykuuesunga ya linga elila lia tapika.

²⁰ Omõla o kuete olondunge o sanjuisa isiaye, eveke li tomba tomba inaye.

²¹ Uveke, ku wa kamba olondunge, u linga esanju, puãi ukualondunge o suñamisa onjila yaye.

²² Nda ka pa li alungulo ovina vi sokiyiwa vi nyõlẽha. Nda olondunguli via lova ovina vi pita ciwa.

²³ Oku popia ondaka ya sesamẽla otembo yaco ku sanjuisa u wa yi popia. U ya kuatisa,— hesanjuko-o!

²⁴ Onjila yukualondunge yi loña kilu komuenyo, ha yuvula onjembo yi kasi posi.

²⁵ Yehova o papulula onjo yukuepela, puãi o kolisa olongave viocimbumba.

²⁶ Ovisimilo viavakuevĩho Yehova o vi nyale olondaka viava va yela vutima viu sanjuisa.

²⁷ Ukuacipululu o luahalisa onjo yaye. U o suvuka ovitukiko eye o tumala hũ.

²⁸ Ondingesunga yi sokolola eci a tambulula, puãi omela wondingaĩvi u popia popia evĩho.

²⁹ Yehova o kasi ocipãla londingaĩvi, puãi o yeva yeva ohutililo yondingesunga.

³⁰ Ocinyi covaso ci sanjuisa utima; asapulo awa a pamisa akepa.

³¹ U o yevelela alungulo ocili o tunga kumosi la vakualondunge.

³² U o nyale alungulo o pembula omuenyo waye; u o tava oku longiwa o limuisa uloño.

³³ Oku sumbila Yehova ku longisa olondu nge. Umbombe u koka oku sumbiwa.