OLOSAPO 14 - Embimbiliya - Bíblia Sagrada em Umbundu

¹ Ndunge o litungila onjo, Eveke puãi o yi tungulula lovaka aye.

² U endaenda ca suñama o sumbila Yehova; ukuanjila ya penga u pembula.

³ Ombangulo yeveke yi linga ombueti vonyima yaye; ovimẽla via vakualondunge vi va popela.

⁴ Oku ka kuli olongombe ka kuli olomema; ovaima a lova a tunda kongusu yongombe.

⁵ Ombangi yocili ka yi kembi; ombangi yesanda yi vangola uhembi.

⁶ Ukuetombo o sanda sanda olondunge kuenje ka vi sangi; ukualondunge oku kuata uloño co leluka.

⁷ Liamuha leveke, momo kokuaye ku sangiko olondaka violondunge.

⁸ Olondunge viukuotate oku kũlĩhisa olonjila viaye; uveke waveke u va liana.

⁹ Suku o pembula ondingekandu, o sanjukila ondingesunga.

¹⁰ Utima u kũlĩha okuvala kuawo muẽle; wiñi ka litengi vesanju liawo.

¹¹ Onjo yondingaĩvi yi papuluka, osinge yukuesunga puãi yi tumãla.

¹² Kuli onjila yimue yi mõleha kumunu okuti ya suñama, efulilo liayo puãi, olio onjila yi panda kokufa.

¹³ Ndaño poku yola utima u vala vala, efulilo lionjolela esumuo.

¹⁴ Ukuemande o kutisua lepako liolonjila viaye. Ukuesunga o kutisua lepako liovilinga viaye.

¹⁵ U wa kamba olondunge o tava ño viosi, u wa lunguka o kulĩhisa oku a enda.

¹⁶ Ukualondunge o lunguka, o tinduka kũvi, eveke li liwekako oku lipokuisa, hailio ka li litati.

¹⁷ U o tematema lonjanga o linga viuveke, ukualondunge puãi o likolisila.

¹⁸ Ava va kamba olondunge va piñala uveke, puãi ava va lunguka va futisua lukũlĩhiso.

¹⁹ Olondingaivi vi petama kovaso olondingesunga. Vakuakandu va talama kolombundi via vakuesunga.

²⁰ Osuke yi suvukiwa ndaño lu va lisungue, ohuasi puãi yi kuete akamba va lua.

²¹ U o lavisa ukuavo o linga ekandu, u puãi o lingainga ohenda kolosuke o sumũlũha.

²² Vakuakupanga evĩho hẽ ka va lueya? Vakuakupanga esunga puãi va sanga ohenda locili.

²³ Upange wosi u kuete onima. Upopi waño u tuala kusuke.

²⁴ Ocifuto cavakualondunge ukuasi wavo, ocifuto caveke uveke.

²⁵ Ombangi yocili yi popela ovimuenyo, puãi u imba uvangi wuhembi omakuli.

²⁶ Ukuakusumbila Yehova wa pamisua, omãla vaye va kuete ocikolo cavo.

²⁷ Ohu sumbila Yehova oko ono yomuenyo, okuti olonjanjo viokufa vi yuvuiwa lakuo.

²⁸ Kowiñi womanu oko kuli ulamba wosoma, ka pali omanu osoma yi nyolẽha.

²⁹ U o livala konyeño wa lunguka muẽle, u o tema tema lonjanga o lekisa uveke.

³⁰ Utima nda wa tula etimba li kala ciwa, puãi alivelo ãvi a volisa akepa.

³¹ U o linga lãvi osuke o pembula usovoli waye, u o lingila osuke ohenda u kemainya.

³² Ondingaĩvi yi nyõleha lũvi wayo; ondingesunga yi kuete ocikolo omo yi kuete esunga.

³³ Olondunge vi sikaila vutima wonoño, vutima weveke puãi kavimo.

³⁴ Esunga li kemainya ofeka; akandu a pembuisa omanu vosi.

³⁵ Ukuenje ukualondunge o soliwa losoma, ukuakukutisasõi puãi o sanga onyeño yaye.