OLOSAPO 12 - Embimbiliya - Bíblia Sagrada em Umbundu

¹ Wosi o sole oku pindisua eye o sole ukũlĩhiso, u puãi o suvuka oku longiwa eye wa seluka.

² Ukuesunga o tambula ohenda ku Yehova, u o sima sima evĩho puãi o tambula episo.

³ Lomue omunu o tuamẽla levĩho, olombombo viukuesunga puãi ka vi veyuka.

⁴ Ukãi uwa eye ulamba wa veyaye, ukãi ukuesanda puãi wa soka ndoku vola vakepa aye.

⁵ Ovisimĩlo violondingesunga viocili, alungulo olondingaĩvi elimbi.

⁶ Olondaka violondingaĩvi vi lavakala osonde, omẽla wa vakuesunga puãi u popela omanu.

⁷ Olondingaĩvi vi lunduiwa kuenje vi takata, onjo yukuesunga puãi yi tumãla.

⁸ Omunu o sivayiwa ndolondunge viaye, ukuemande puãi o lavisiwa.

⁹ Omunu o sule, o litekula lupange waye, eye wa velapo, omunu o likemainya, puãi wa suka okulia, eye o sule.

¹⁰ Ondingesunga yi sokolola omuenyo wocinyama cayo, ohenda yondingaĩvi puãi ungangala.

¹¹ U o lima lima ovapia aye eye o sanga okulia ku u tẽla, puãi u o tungayala ño eye wa kamba olondunge.

¹² Ocikolo condingaĩvi ci papuluka, olombombo violondingesunga puãi vi kuatelela.

¹³ Ukuevĩho o kuatiwa lolohole viomẽla waye, ukuesunga puãi o puluka kelamba.

¹⁴ Epako liwa liomẽla li kutisa omunu, ovopange ovaka omunu o tiuwila onima.

¹⁵ Onjila yeveke yo sunguluka, ukualondunge puãi o yeva kalungulo.

¹⁶ Onyeño yeveke yi limbukiwa lonjanga, u wa lunguka puãi o pukula eci cu valula.

¹⁷ Ukuakupopia ocili imba uvangi wesunga, ombangi yesanda puãi yi popia uhembi.

¹⁸ Ku li u olondaka viaye viukãlu via soka ndokutoma kuosipata, elimi liukualondunge puãi li sakula.

¹⁹ Omẽla wukuacili u kala hũ, elimi liuhembi puãi li pua lombili.

²⁰ Elimbi li kasi vutima wava va panga evĩho, ava puãi va panga esunga va kuete onjolela.

²¹ Lacimue cĩvi ciya kukuesunga, olondingaĩvi puãi vi tala tala olohali.

²² Yehova o nyale ovimẽla viuhembi, puãi o sanjukila vakuakulinga ocili.

²³ Ukualondunge o kendikiya uloño waye, aveke puãi va kaloka oku sapula uveke wavo.

²⁴ Eka liukuambili li kuata uviali, ocisiãi puãi ci pangisua oku linga upange.

²⁵ Ohele vutima womunu yu petamisa, ondaka yohenda puãi yu petula.

²⁶ Ukuesunga o sia evĩho, onjila yolondingaĩvi yi va nyẽlisa.

²⁷ Ukuawesi ka yoki ositu a yeva, ukuambili puãi o limuisa ukuasi wa lua.

²⁸ Vonjila yesunga muli omuenyo, onjila yekandu puãi yi panda kokufa.