OLOSAPO 11 - Embimbiliya - Bíblia Sagrada em Umbundu

¹ Omesaliso yeliaño Yehova o yi nyale, oseteko yocili yu sanjuisa.

² Eci epela liya oco osõi yiyavo, ambombe puãi, ovo va kuete olondunge.

³ Ocili ca vakuesunga ci va songuila, puãi okutatama kuolondingaĩvi ku va nyõla.

⁴ Ukuasi ko sumũluisa keteke lionyeño, esunga puãi li popela kokufa.

⁵ Esunga liukuacili liu suñamisila onjila yaye, ondingaĩvi puãi yi nyolẽha lũvi wayo.

⁶ Esunga liava va pua evelo li va popela, vakuelimbi puãi va kuatiwa lolohõle viavo.

⁷ Eci omunu ũvi a fa elavoko liaye limuha, elavoko lia vakuevĩho li pua.

⁸ Ondingesunga yi puluka kelamba, ondingaĩvi yi piñalapo.

⁹ Omunu ũvi o nyõla ukuavo lomẽla waye, olondingesunga puãi vi popeliwa lukũlĩhiso.

¹⁰ Vakuesunga nda va sumũlũha imbo li yolela, olondingaĩvi nda vi nyõleha omanu volula.

¹¹ Imbo li kemalisua lesumũluho lia vakuacili, puãi lomẽla wolondingaĩvi li papuluka.

¹² U o lavisa ukuavo wa kamba olondunge, puãi u wa lunguka uha ño.

¹³ Emamõhe o limbulula viuyombeki, puãi u wa kolelua ocili o vi uhila.

¹⁴ Apa ka peli alungulo omanu va nyõlẽha, apa puãi peli olondunguli via lova opo peli okukoka.

¹⁵ U wa likapa uvangi wu ka kulĩhĩle o yambuiwa, puãi u o nyale olonjeke o koka.

¹⁶ Ukãi wa sunguluka o sumbiwa, alume vakuacipululu va limuisa ukuasi.

¹⁷ Ukuahenda o lisumuluisa eye muẽle, ukuaviñali puãi o livalula eye muẽle.

¹⁸ Ondingaĩvi yi tambula ofeto yesanda, ukuakuwaya esunga puãi o tambula onima yocili.

¹⁹ U o kuama esunga o panda komuenyo, u o kuama evĩho o limuisa okufa.

²⁰ Yehova o nyale vakuelimbi liutima, vakualonjila via pua evĩho puãi o va sanjukila.

²¹ Ocili muẽle ondingaĩvi ka yi pumbi oku yambuiwa, olondingesunga puãi vi popelua.

²² Ndeci ocinunga culu kupinyo wongulu, haico ci kasi ukãi wa posoka nda ka kuete olondunge.

²³ Onjongole yondingesunga yi sulila lika vuwa, elavoko liondingaĩvi li sulila vonyeño,

²⁴ Umue ecaeca oviali, haimo ukuasi waye u yukinyua. Ukuavo puãi o limĩla, ka ecaeca ndomo co sesamẽla oku eca, kuenje o mõla usuke.

²⁵ Ukuacali o sumũlũha. U o nyuisa nyuisa ovava o nyuisiwavo.

²⁶ Omanu va siñala u o va limĩla olomema, puãi asumũlũho a kala lu o va vi landaisa.

²⁷ U o sandiliya esunga o sandiliya oku soliwa, evĩho puaĩ liya ku o sandiliya evĩho.

²⁸ U o kolela ukuasi waye uvuka, vakuesunga puãi vamako ndemela lionjovo.

²⁹ U o sakalaisa onjo yaye o siala vofela. Eveke li vumba ukualondunge.

³⁰ Epako liukuesunga uti womuenyo. Ukualondunge o kuata kuata ovitima viomanu.

³¹ Nda ukuesunga o yambuiwa palo posi ka ci piãla hẽ kondingaĩvi lukuakandu?