OLOSAPO 1 - Embimbiliya - Bíblia Sagrada em Umbundu

¹ Olosapo via Salomone, omõla a Daviti, haeye Soma ya va Isareli, vievi:

² Okuti omanu va kũlĩha olondunge loku longiwa, va yeva olondaka viuloño,

³ va pindisua levi via sunguluka, levi viesunga locili, levi via suñama,

⁴ okuti olondunge vi eciwa ku vakuanumbi, lukũlĩhiso lesuluviko kamalẽhe.

⁵ Ukualondunge layevo o tẽla oku yeva loku amamako kukũlĩhiso, lu wa lunguka o tẽla oku liupilako uloño

⁶ woku yeva olusapo locisetahai, kuenda olondaka violonoño lalupolo avio.

⁷ Oku sumbila Yehova oko efetikilo liolondunge. Aveke va tomba tomba uloño loku longiwa.

⁸ Amõlãnge, tava kalungulo aso, ku ka sinile okulonga kua nyoho.

⁹ Momo ovio via linga ocifuto ca posoka kutue wove, kuenda olomota posingo yove.

¹⁰ Amõlange, nda olondingaĩvi vi ku tamba ku ka tave.

¹¹ Nda va linga vati, Enju tu ende, tu ka lavekele osonde, tu ka seselele omãla vamãle olivova,

¹² tu va ine ño lomuenyo ndeci ongehena, pamue olungunge ndeci eyambo;

¹³ oco tu mõla ukuasi wosi wa posoka, tu yukisa olonjo vietu levi tu punda;

¹⁴ litokeka yapa letu; tu kali lonjeke yimosi pokati ketu.—

¹⁵ Amõlange, ku ka endaende lavo. Yuwisa olomãi viove kalila avo.

¹⁶ Momo olomãi viavo vi loña kũvi, va yayuila oku pesela osonde.

¹⁷ Momo onjanjo yi petuiwa omangonya nda onjila yi yi lete ale.

¹⁸ Ovo puãi, osonde yavo muẽle va yi lavekela; lovimuenyo viavo muẽle va vi seselela.

¹⁹ Olio efulilo lia vosi va sanga ukuasi poku punda. Ava va ci linga va liwa ovo muẽle.

²⁰ Ndunge o vilakayaila volokololo, o kalokaila vovitanda.

²¹ O vilakayaila povila; o kundaila kolombundi vimbo, hati,

²² Ene, a vakuanumbi, toke eteke lipi vu sola onumbi yene? Lene, alomembuli, toke eteke lipi vu sanjukila okupembula kuene? Lene, aveke, toke eteke lipi vu suvuka olondunge?

²³ Yevi okutembula kuange. Ndu situluili utima wange. Ndu sapuili olondaka viange.

²⁴ Omo ndo kovongi kuenje wa likali, ndo payuli kuenje lomue wa tava,

²⁵ puãi wa pukuli alungulo ange osi, kuenda ka wa taveli kokulemẽla kuange,

²⁶ oco njola epembe ohali yene, ndu laluli eteke usumba wu kuati,

²⁷ eteke usumba wu kuati ndehunguhungu, kuenda olohali viu veti ndocipepe, lelamba longuele viu wili.

²⁸ Oco va mbilikiya, puãi si tava, va sandiliya, puãi ka va sangi.

²⁹ Omo va suvuka olondunge, kuenje ka va nolẽle oku sumbila Yehova,

³⁰ ka va yonguile alungulo ange, kuenje va lavisa okulonga kuange kuosi,

³¹ oco va lia epako liovituwa viavo, ve kuta enene ovisimilo viavo muẽle.

³² Ocili umbinde wa vakuanumbi u va fisa, eveli liaveke li va nyõla.

³³ U o njeva puãi o kala ciwa, utima u tula, usumba wevĩho mbu.