OLOSAMO 97 - Embimbiliya - Bíblia Sagrada em Umbundu

¹ Yehova o viala. Olofeka viosi vi yolele. Olofeka viokonele yokalunga vi sanjuke.

² Alende lowelema o ñuala. Esunga kuenda ocili ovio ociseveto cocalo caye.

³ Ondalu yu pitila kovaso, kuenje yi temiha ovanyali vo ñuala.

⁴ Oviliakulo viaye vi tuila oluali. Ongongo yi vi mõla, kuenje yi luluma.

⁵ Olomunda vi yenguluka ndesela kovaso a Yehova, okuti kovaso a Muẽlealuali luosi.

⁶ Ilu li sapula esunga liaye. Omanu vosi va mõla ulamba waye.

⁷ Vosi va vumba oviñumañuma, loku lipandela oviteka viesanda, va kutiwa osõi. Olosuku viosi viu petamela.

⁸ Siono o ci yeva kuenje, o sanjuka. Omãla va Yuda vafeko va yolela, va yolelela olonimbu viove, a Yehova.

⁹ Momo ove, a Yehova, wa tulamela oluali luosi. Ove wa kemãla ca piãla kolosuku viosi.

¹⁰ Yehova o sole ava va suvuka evĩho. Eye o silamela ovimuenyo violosandu viaye. O va popela povaka olondingaĩvi.

¹¹ Ongula ya tolela olondingesunga, lesanju lia eciwilua ava va sunguluka kutima.

¹² Sanjukili Yehova, ene alondingesunga. Leci wivaluki okukola kuaye, panduli.