OLOSAMO 94 - Embimbiliya - Bíblia Sagrada em Umbundu

¹ A Yehova, a Suku yefetuluinyo, a Suku yefetuluinyo, tukuluka.

² Pinduka, anganji yoluali. Muisa vakuakulituna eci ca va sesamela.

³ A Yehova, olondingaĩvi hẽ, toke eteke lipi, olondingaĩvi, toke eteke lipi, vi tambela ño?

⁴ Vi yuela, vi popia popia loku lituna. Olondingaĩvi viosi vi lipandiya.

⁵ Vi sasola omanu vove, a Yehova. Vi yambula ocipiñalo cove.

⁶ Vi ipa ipa ocimbumba lukualofeka. Vi ponda olosiwe.

⁷ Vi linga viti, Yehova ka ci moli, Suku ya Yakoba ka ci tendi.

⁸ Ene wa wului pokati komanu, sokololi. Ene waveke, eteke lipi wu kuata olondunge?

⁹ U wa kapa etui hẽ, ka yevi? U wa lulika iso hẽ, ka lete?

¹⁰ U o yambula olofeka hẽ, ka lungula? Yehova, u o longisa omanu olondunge,

¹¹ eye wa kũlĩha ovisimĩlo viomanu, okuti viesanda.

¹² A Yehova, omunu ove o yambula wa sumũlũha, ndaño u ove o longa longa londaka yove,

¹³ okuti u kavuluisa koloneke viohali, toke va fẽlẽla olondingaĩvi okueve.

¹⁴ Momo Yehova ka pañula omanu vaye, ka yanduluka ocipiñalo caye.

¹⁵ Momo okutetuluiwa lesunga kuiya vali ku vakuesunga, kuenje vosi vakuesunga liovutima va ku kuama.

¹⁶ Elie o ñatukilila olondingaĩvi? Elie o ñalela konyima kolondingakandu?

¹⁷ Nda Yehova ka kaile oñuatisi yange, omuenyo wange nda ndopo wa kala muna muoha.

¹⁸ Eci nda linga siti, Omai yange yi siẽluha, ocisola cove ka ci pui, a Yehova, ca njakela.

¹⁹ Eci atatahãi a nduila vutima, okulemba kuove oko ku ñolisa.

²⁰ Olombiali vievĩho hẽ, evi ovihandeleko viavo vi koka ohali, vi tẽla nga oku likongela love?

²¹ Va lipungikila omuenyo wukuesunga, lava va pua eko va va tukuila okufa.

²² Yehova puãi wa linga ocikolo cange. Suku yange wa linga ewe liociwundilo cange.

²³ Eye o va tiuwila olohõle viavo, loku va takisila evĩho liavo. Yehova Suku yetu o va nyõla.