OLOSAMO 9 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti, elaka liaco Muti Lahane.

¹ Mandula Yehova lutima wange wosi. Sapula ovikomo viosi wa linga.

² Hu sanjukila loku nyamula. Njimbila onduko yove esivayo, a Tõlo.

³ Eci ovanyali vange va kondoka, va likonjoka, va nyolẽhẽla kovaso ove.

⁴ Wa mopelako esunga kondaka yange. Wa tumala kocalo oku tetulula lesunga.

⁵ Wa lemela olofeka, wa nyola olondingaĩvi. Wa imula olonduko viavo oloneke ka vi pui.

⁶ Ovanyali va pua, va nyõleha olumue. Wa nyõla ovaimbo avo, ndaño oku a ivaluka kua imuha.

⁷ Yehova puãi o tumala hũ kocalo caye. Ocalo caye wa ci angiliyila ekanga.

⁸ O tetuluila oluali lesunga. O tetuluila omanu lesunguluko.

⁹ Yehova ocikolo cava va fukĩlisua, ocikolo kotembo yohali.

¹⁰ Ava va kũlĩha onduko yove va ku kolela. Momo ove, a Yehova, kua yandulukile ava va ku sanda.

¹¹ Yehova wa tunga vo Siono, u wimbili asivayo. Sapuli ovilinga viaye pokati komanu.

¹² Momo u o fetuluinya osonde o va ivaluka Ka ivala okuliyula kuava va fukilisua.

¹³ Ndinge ohenda, a Yehova. Vanja ohali yi nalaisa ava va suvuka. Ove wa mindula kolombundi viokufa

¹⁴ okuti sapula esivayo liove liosi, kuenje njolela eyovo liove volombundi viomõla a Siono ukãi.

¹⁵ Vakualofeka va fa vokueve va fẽla. Vowanda va ta mua fa olomai viavo muẽle.

¹⁶ Yehova wa likemalisa yu wa yala ekanga. Ondingaĩvi ya kuatiwa lovilinga viovaka ayo muẽle.

¹⁷ Olondingaĩvi, okuti omanu vosi va ivala Suku, va tumiwa konjembo

¹⁸ Momo okuivala olosuke ka ku endi ño-o hũ, ndaño elavoko liolohukui ka li puapua ño-o otembo yosi.

¹⁹ A Yehova, votoka, omunu ka ka yule. Olofeka vi tetuluiwe kovaso ove.

²⁰ A Yehova, vi yokokisa. Olofeka vi lilimbuke okuti omanu vaño.