OLOSAMO 89 - Embimbiliya - Bíblia Sagrada em Umbundu

Ocisungo cu Esera Etane. Osamo yoku sokoluisa.

¹ Njimbila ocisola ka ci pui ca Yehova oloneke viosi. Lomela wange sapula kovitumbulukila viosi ocili cove.

² Nda linga siti, Ocisola ka ci pui ci kolisua ñ-o hũ. Kilu o kolisa ocili cove.

³ Nda likuminya ohuminyo lu nda nola. Nda lisinga lukuenje wange Daviti,

⁴ siti, Ñolisa ombuto yove oloneke ka vi pui. Numalisa ocalo cove cusoma toke kovitumbulukila viosi.

⁵ Ilu li sivave ovikomo viove, a Yehova, locili cove vekongelo liava va kola.

⁶ Vovailu helie o tẽla oku sokisua la Yehova? Pokati komãla volosuku helie wa lisoka la Yehova?

⁷ Vongombo yava va kola Suku ukuakululumisa cimue. O lingisa usumba wa velapo, vosi vo ñuala ci sule.

⁸ A Yehova Suku yolohoka, helie wa lisoka love kunene, a Yehova? Ocili cove ca ku ñuala.

⁹ Ove o viala unene wokalunga. Eci akimba aco a tumuha ove o a tulumula.

¹⁰ Wa teya Egito ndu wa ipaiwa ongambu. Wa sandula ovanyali vove lokuokuo kuove kuongusu.

¹¹ Ilu liove, osi layovo yove. Oluali lovina viosi vi kasimo ove wa vi lulika.

¹² Norte la Sul ove wa vi sovola. Tavore la Hermone vi yolela onduko yove.

¹³ O kasi lokuokuo kua pama. Eka liove lia kola, eka liove liondio lia kemãla.

¹⁴ Esunga loku sunguluka ovio ociseveto cocalo cove. Ocisola ka ci pui kuenda ocili vi ku pitaila kovaso.

¹⁵ A Yehova, omanu va kũlĩha ondaka yonjolela, haivo va endaila vocinyei cocipala cove,

¹⁶ loku yolela onduko yove eteke liosi, kuenda oku kemalisa esunga liove, ove va sumũlũha.

¹⁷ Momo ove wulamba wunene wavo. Lombinga yetu yi kemala omo ove uñuatisi yetu.

¹⁸ Momo Yehova eye ombindikiyo yetu. U o kola wa Isareli eye Soma yetu.

¹⁹ Kosiahũlu wa popia lu wove wa koleliwa. Wa popela vocinjoinjoi, huti, Nda kapa ekolowa kumue wa pama. Nda kemalisa umue wa noliwa pokati komanu.

²⁰ Nda sanga Daviti ukuenje wange. Ndo waveka lulela wange u kola,

²¹ okuti eka liange li kala kala laye, lokuokuo kuange ku u pamisa.

²² Unyali ko yuli, kuenda vakuevĩho ka vo ketisa.

²³ Nyanyowaila ovanyali vaye kovaso aye. Nyõla ava vo suvuka.

²⁴ Kokuaye puãi ku tiama ocili cange kuenda ocisola cange ka ci pui. Ombinga yaye yi kemalisua mekonda lionduko yange.

²⁵ Ñapa eka liaye kokalunga, eka liaye liondio polondui.

²⁶ O mbilikiya hati, Ove wu Tate, wu Suku yange, haive uwe lieyovo liange.

²⁷ Ndu tukula nuñulu yange. Ndu piãlisa pokati kolosoma viokilu lieve.

²⁸ Ndu solekela ocisola cange ka ci pui oloneke viosi. Ohuminyo yange kokuaye yi linga yocili.

²⁹ Ombuto yaye ndi yi tumalisa okuti ka yi pui, localo caye ndi ci sokisa loloneke viovailu.

³⁰ Nda omãla vaye va yanduluka ovihandeleko viange, nda ka va endi lovihõlo viange,

³¹ nda va sama sama ovisila viange, kuenje ka va pokola kovihandeleko viange,

³² oco okulueya kuavo ndi ku longa loluhava, longole yavo lolombole.

³³ Haimo lumue ocisola cange ka ci pui si ci upi, ndaño ocili cange si ci imula.

³⁴ Si nyõli ohuminyo yange. Eci ca tunda komela wange si ci pongolola.

³⁵ Cimosi nda lisinga lokukola kuange. Si kembi ku Daviti.

³⁶ Ombuto yaye yi kala hũ, ka yi pui. Ocalo caye cenda ño-o kovaso ange ndekumbi.

³⁷ Ci kolapo oloneke viosi ndosãi. Uvangi u kasi kovailu u koleliwa.

³⁸ Cilo puãi wa takumula, loku pañula, wa temela ombuavekua yove.

³⁹ Wa tokoka ohuminyo wa likuminya lu kuenje wove. Wa vĩhisa ekolowa liaye, wa li inasi posi.

⁴⁰ Wa kupula ovimbaka viaye viosi, lolombonge viaye wa vi nyõla.

⁴¹ Vosi va vinjuka vo punda. Wa linga ocisepelei cava va lisungue laye.

⁴² Wa kemainyisa ovaka olondio ovanyali vaye. Ovanyali vaye vosi wa va sanjuisa.

⁴³ Ocili, wa tiula konyima osipata yaye, kuo talamisile vocilunga.

⁴⁴ Wopa epangati peka liaye, localo caye wa ci kupuila posi.

⁴⁵ Oloneke viovukuenje waye wa vi tepulula. Wo kutisa osõi.

⁴⁶ Toke eteke lipi, a Yehova? O lisalamisa ño-o hẽ, oloneke vi enda ño-o hũ? Onyeño yove yi tema tema hẽ ndondalu toke eteke lipi?

⁴⁷ A Yehova, ivaluka omuenyo womunu okuti umbumbulu. Ivaluka okuhongua kuomãla vomanu wa sovola.

⁴⁸ Omunu upi o kala ño lomuenyo, ka mõli okufa? Helie o tẽla oku popela omuenyo waye kunene wonjembo?

⁴⁹ A Yehova, ocisola cove ka ci pui cokosiahũlu, haico wa likuminya locili cove cosi, oku sola laco Daviti, ci kasi pi?

⁵⁰ Ivaluka, a Yehova, efuki liukuenje wove, ndomo ngambata vonete epembe lia ngasa olofeka,

⁵¹ hailio ovanyali vove va fukũisa lalio, a Yehova, va fukĩlisa lalio olomai viombuavekua yove.

⁵² Yehova a sivayiwe hũ. Amene. Amene.