OLOSAMO 88 - Embimbiliya - Bíblia Sagrada em Umbundu

Ocisungo. Osamo ya va Kora. Kusongui wolonjimbi. Elaka liaco, Mahalote Leanote. Osamo yoku sokoluisa yu Esera Hemane.

¹ A Yehova Suku yange, utanya hu vilikiya okuti o ñuatisa. Luteke le ndi likutilila kokuove.

² Okulikutilila kuange ku pitile kokuove. Vonguila etui kevilikiyo liange.

³ Momo vutima wange mue yuka ohali. Omuenyo wange u panda konjembo.

⁴ Va nukuila pamosi lava va lokila vonjembo. Ndimunu wa pua ongusu.

⁵ Pokati kava va fa ñasi ndu wa takumuiwa. Ñasi ndava va pondiwa va pekela veyambo. Nda lisoka lava ove ku ivaluka vali, momo va tepiwa peka liove.

⁶ Wa ñapa vonjembo ya sulako, muna mua tekava wi, valondo.

⁷ Onyeño yove yi nema cimue. Wa suvalisa lakimba ove osi.

⁸ Vakuetu wa va njuvuisa. Wa ndingisa ndeci ci linga onyanya kokuavo. Nda yikiwa, oku tunda si ci tẽla.

⁹ Ovaso ange a vuvala lohali. Eteke keteke hu vilikiya, a Yehova. Ngoluĩla ovaka ange kokuove.

¹⁰ O lingila hẽ, ovikomo ava va fa? Ovilelembia hẽ, vi pinduka oku ku sivaya?

¹¹ Ocisola cove ka ci pui hẽ, ci lomboluiwa veyambo? Pamue ocili cove vo Kunyõlẽha?

¹² Vowelema hẽ, mu limbukiwa ovikomo viove, pamue ekuatiso liove lioku popela vofeka yunjiva?

¹³ Kokuove puãi, a Yehova, oko nda liyuila. Omele ohutililo yange yenda kokuove.

¹⁴ A Yehova, wa inasila nye omuenyo wange? Nye wa salamisila ocipala cove?

¹⁵ Nda suvala haime ndukuakufa tunde kutila wange. Nda lemiwa lohali wa nalisa. Oñuatisi si kuete.

¹⁶ Onyeño yove ya tua ya mungula. Okusaluisa kuove kua netako,

¹⁷ kua ñuala ndovava eteke liosi, kua mungikila pamosi.

¹⁸ Ukuacisola lekamba wa va amisa kupãla lame. Onjiwe yange owelema.