OLOSAMO 86 - Embimbiliya - Bíblia Sagrada em Umbundu

Osamo ya Daviti.

¹ Vongola etui liove, a Yehova, nambulule, momo ndihukui, haime ndisuke.

² Lava omuenyo wange momo ndukuesunga lia Suku. Popela ukuenje wove wa ku kolela.

³ Ove u Suku yange. Ndinge ohenda, a Yehova, momo hu vilikiya eteke liosi.

⁴ Sanjuisa utima wukuenje wove, momo kokuove oko ndukuakupetuila utima, a Yehova.

⁵ Momo ove, a Yehova, wa sunguluka haive wukuakuecela. O kuetele vosi va ku vilikiya ocisola ka ci pui.

⁶ Vonguila etui, a Yehova, kokulikutilila kuange. Yevelela ondaka yalombelo ange.

⁷ Eteke liohali yange hu vilikiya momo o nambulula.

⁸ Pokati kolosuku ka pa li u wa soka love, a Yehova. Lavimue ovilinga via soka lovilinga viove.

⁹ Olofeka viosi wa tunga viya, vi ku fendela, a Yehova. Vi tumbangiya onduko yove.

¹⁰ Momo ove wa kemala haive o lingainga ovikomo. Ove lika Suku.

¹¹ Ndongise onjila yove, a Yehova, okuti ngendaenda locili cove. Pandeka utima wange kesumbilo lionduko yove.

¹² A Yehova Suku yange, hu pandula lutima wange wosi. Ñemainya onduko yove oloneke viosi.

¹³ Momo ocisola cove ka ci pui kokuange ca lua. Wa popela omuenyo wange kalondo onjembo.

¹⁴ A Suku, vakuemande va ñatukila. Usoko wovanyoli u sanda omuenyo wange. Ka va ku kapi kovaso avo.

¹⁵ Ove puãi, a Yehova, wu Suku yohenda, haive wukuacili. O livala konyeño. Ocisola cove ka ci pui kuenda ocili cove via lua cimue.

¹⁶ Mongolokele, ñuatele ohenda. Muisa ukuenje wove ongusu yove. Popela omõla wa cita ufeko wove.

¹⁷ Ndekise ondimbukiso yokuti wa nundila olunda, okuti ava va suvuka va ci mõla kuenje va kutiwa osõi, momo ove, a Yehova, wa ngohela haive wa ndembeleka.