OLOSAMO 83 - Embimbiliya - Bíblia Sagrada em Umbundu

Ocisungo. Osamo ya Asafe.

¹ A Suku, ku kõhe. Ku ka linge ndesima, ku ka ekelele, a Suku.

² Momo ovanyali vove va yuela. Ava va ku suvuka va petula ovitue.

³ Va tumbila omanu vove ahãla atutu, lava va wunda kokuove va va tumbika olongombo.

⁴ Va linga vati, Kokeli, tu va nyõli okuti ka va lingi ofeka. Onduko ya Isareli ka yi ka ivalukiwe vali.

⁵ Ocili, va limba onumbi lutima umosi. Va ku tumbika ongombo.

⁶ Olombalaka via Edome la va Isareli, via Moavi la va Hagare,

⁷ va Gevale, va Amone, la va Amaleke, va Filisiti kumue la va Turo.

⁸ Va Asuriya lavovo va litokeka lavo, vohela va Lote.

⁹ Linga lavo ndomo wa linga la va Midiane, la Sisera la Yavini, kuna kolui Kisione.

¹⁰ Ovo va kundukila ke Endore. Va linga ndombolela yoposi.

¹¹ Lingisa olombuale viavo nda Oreve la Seve. Olosoma viavo vi lisoke la Seva la Calimuna,

¹² vana va linga vati, Tu kuati ovisenge via Suku ha vi lingi vietu.

¹³ A Suku yange, va lingisa ndoneketela yocipepe, pamue ndovinene vi enda lofela.

¹⁴ Ndeci ondalu yi timĩha esisi, pamue ulienge u yoka olomunda,

¹⁵ haico va lupuisa lekungukungu liove, loku va yokokisa lofela yove yonupi.

¹⁶ Kutisa ovipala viavo osõi ha va sandi onduko yove, a Yehova.

¹⁷ Va kutiwe osõi loku tokotelua oloneke viosi. Va take losõi yavo.

¹⁸ Oco va limbuka okuti ove, onduko yove Yehova, ove, lika wove, Tõlo koluali luosi.