OLOSAMO 82 - Embimbiliya - Bíblia Sagrada em Umbundu

Osamo ya Asafe.

¹ Suku wa tumãla vonjango yolosuku. Wa tumãla pokati kolosuku oku tetulula, hati,

² Eteke lipi wimbipo oku tetulula lesanda loku kuatela olondingaĩvi ocame?

³ Tetuluili lesunga ohukui losiwe. Lingi onyima yava va kangisua, lava ka va kuete oñuatisi.

⁴ Popeli ava va hongua kuenda olosuke. Va patusuli povaka olondingaĩvi.

⁵ Ka va kuete ukũlĩhiso ndaño olondunge vioku limbuka. Va tuñayala vowelema. Oviseveto viosi violuali via lisenga.

⁶ Mopia siti, Ene wulosuku. Ene vosi wumãla va Tõlo.

⁷ Haimo lumue, vu fa ndomanu. Wu kupuka ndombuale yosi ño.

⁸ Votoka, a Suku, tetuluila oluali, momo olofeka viosi vi tiamela kokuove.