OLOSAMO 80 - Embimbiliya - Bíblia Sagrada em Umbundu

Kusongui wolonjimbi. Elaka liaco, Siosianimi Eduti. Uvangi wa Asafe. Osamo.

¹ Yevelela, ongombo wa Isareli. Ove o songuila Yosefe ndocunda colomeme. Okuakutumãla ko va Keruvi, litukulula

² kovaso a Efarimi la Benjamini kuenda Manase. Pindula ongusu yove. Enju o tu popele.

³ Tu tumbulule, a Suku, Tuisa ocipãla cove oco tu yovoke.

⁴ A Yehova Suku yolohoka, toke pi o temela okulikutilila kuomanu vove?

⁵ Wa va tekola lombolo yasuẽlela. Wa va nyuisa asuẽlela akahandangala.

⁶ Wa tu pembuisa lava va lisungue letu. Ovanyali vetu va yola yola.

⁷ Tu tumbulule, a Suku yolohoka. Tuisa ocipãla cove oco tu yovoke.

⁸ Ove wopa ve Egito uti wayuva. Wa lupula olofeka kuenje wo tuika.

⁹ Wo wangiliyila osi. Ovi viawo via tuamela kuenje wa yandela vofeka.

¹⁰ Olomunda via sitikiwa lundembo wawo. Ovianja viawo via sikĩlĩla oviti vinene violo-cedro.

¹¹ Wa tandisa olonavi toke kokalunga, lovinjovelela viawo toke ko Lui.

¹² Oco wa tunguluila nye ovimbaka viawo okuti vosi va vinjuka va yunga yungako?

¹³ Onguluve yi tunda vusenge yi kotola. Ovinyama viosi viovusenge vi lombolako.

¹⁴ A Suku yolohoka, tua likutilila kokuove, pongoloka. Kilu o kasi vanja posi. Tala. Kũlĩhisa uti waco.

¹⁵ Popela uti wa tuika eka liove liondio, haiwo wo lipamisila.

¹⁶ Vo yoka londalu, vo timbula. Va nyõlehe lokulemela kuocipala cove.

¹⁷ Eka liove li kale lulume ukueka liove liondio haeye omõla omunu ove wo lipamisila.

¹⁸ Oco ka tu tundi vali kokuove. Tu muise omuenyo kuenje tu vilikiya onduko yove.

¹⁹ Tu tumbulule, a Yehova, Suku yolohoka. Tuisa ocipala cove, oco tu yovoka.