OLOSAMO 78 - Embimbiliya - Bíblia Sagrada em Umbundu

Ocisungo ca Asafe coku sokoluisa.

¹ Amanu vange, imbi ovatui kovilongua viange. Vonguili ovatui kolondaka viomela wange.

² Ngasama omela wange loku ta olusapo. Sapula evi via longa via longisiwile kosiãhulu,

³ haivio tua yeva yeva kuenje tua kũlĩha. Olosekulu vietu via tu vi sapowaila.

⁴ Ka tu vi limbika komãla vavo. Puãi tu sapula kocitumbulukila ci kuamamo ovilinga via kemala via Yehova, lunene waye, kuenda ovikomo a linga.

⁵ Momo wa kapa ovisila vo Yakoba. Wa kapa ovihandeleko vi Isareli, kuenje wa handeleka olosekulu vietu oku vi longisa komãla vavo;

⁶ okuti ocitumbulukila ci kuamamo ci vi kũlĩha, ndaño omãla ka va citiwile handi, okuti va katuka kuenje va vi sapuila omala vavo.

⁷ Va ci linga okuti omãla vaco va imba ovaso ku Suku, kuenje ka va ivalako ovilinga via Suku, va pokola puãi kovihandeleko viaye,

⁸ kuenda okuti ka va lingi nda vaisia ya vaisiavo, haivo ocitumbulukila cesino lolonamalala haico ka ca kaile lutima wa popoloka kesunga. Ovitima viavo ka via pandekelele ku Suku.

⁹ Va Efarimi va maleha lolohonji, haimo va ci tuva veteke liocilunga.

¹⁰ Ka va tatele ocisila ca Suku, puãi va likala oku enda lovihandeleko viaye.

¹¹ Va ivalako ovilinga viaye, lovikomo a va lingila.

¹² Wa lingila ovikomo kovaso olosekulu viavo, vofeka ye Egito, vusenge wa Coana,

¹³ Wa tola okalunga, wa va pitisamo. Wa talamisa ovava aco ndondunda.

¹⁴ Utanya wa va songuila lelende, luteke wosi locinyi condalu.

¹⁵ Wa tola ovawe vekalasoko, kuenje wa va nyuisa ca lua, hutiño ovava ovalondo.

¹⁶ Wa tundisa ovava vewe, kuenje wa pitisa ovava aco ndolondui.

¹⁷ Haimo lumue va amamako oku u lingaila akandu. Va sinila Tõlo vekalasoko.

¹⁸ Va nyika Suku vovitima viavo loku lipilikila okulia kua livela ovitima viavo.

¹⁹ Va tomba Suku, vati, Anga Suku o tẽla oku yala omesa vekalasoko?

²⁰ Wa veta ewe okuti mua tunda ovava, kuenje otundui tua supoka. O tẽlavo hẽ, oku eca ombolo? O muisa hẽ, omanu vaye ositu?

²¹ Oco, eci Yehova a ci yeva, wa tema. Ondalu ya siakaliwila Yakoba. Onyẽno ya wengukila Isareli.

²² Momo ka va kolelele Suku. Ka va kolelele unene waye woku popela.

²³ Haimo lumue wa handeleka ilu. Wa yikulula apito okilu.

²⁴ Wa lola mana ovo ha va li. Wa va avela olomema viokilu.

²⁵ Omanu va lia lia okulia kuava va piãla. Wa va tumisa okulia, ve kuta.

²⁶ Wa sikisa vilu ofela yokutundilo. Wa songuila ofela yo ko Sul longusu yaye.

²⁷ Wa va lowila ositu ndoneketela, lolonjila viavava ndeseke liokalunga.

²⁸ Wa vi lowila vokati kocilombo cavo, polonele violombalaka viavo.

²⁹ Oco va lia, ve kuta. Momo wa va muisa evi va livela.

³⁰ Puãi osimbu ka ve kutile handi, osimbu okulia kua kala vimela viavo,

³¹ oco onyeño ya Suku ya va wengukila, kuenje pokati kavo wa ipayapo ava va velapo kongusu. Wa kupula alume va velapo va Isareli.

³² Haimo lumue va lingainga akandu. Ndaño wa linga ovikomo haimo ka va kolelele.

³³ Oco wa takatisa oloneke viavo ndofela, kuenda alima avo locinjoko.

³⁴ Eci a va ipa oco vo sanda. Va tiuka, va vanjiliya Suku lombili.

³⁵ Va ivaluka okuti Suku eye ewe liavo, kuenda Suku Tõlo eye onjovoli yavo.

³⁶ Puãi vo wasa ombambe lovimela viavo, vo kemba lalimi avo.

³⁷ Koku litumbika kokuaye va tatayala ño. Ka va tatele ocisila caye.

³⁸ Eye puãi, omo ukuahenda, wa va ecela evĩho liavo, ka va nyõlele. Olonjanja via lua wa likandangiya kokutema kuaye, ka wenguile onyeño yaye yosi.

³⁹ Wa ivaluka okuti ovo omanu vakuasitu, haivo ofela yi pita kuenje ka yiya vali.

⁴⁰ Olonjanja viñami hẽ, va tamalala laye vekalasoko loku u nyumalisa vekango?

⁴¹ Vo nyika nyika olonjanja, kuenje va valula U o kola wa Isareli.

⁴² Ka va ivalukile eka liaye, ndaño eteke a va popela kovanyali,

⁴³ eci a kapa olondimbukiso viaye ve Egito, lovikomo viaye vusenge wa Coana.

⁴⁴ Olondui viavo wa vi pongoluisa osonde, okuti ka ca tavele oku nyua kovitovotovo viavo.

⁴⁵ Wa tuma pokati kavo asunga olonyi via va lia, lovinonga via va nyõla.

⁴⁶ Wa eca ovaima avo kovongu, kuenda apako upange wavo kolohuma.

⁴⁷ Wa nyõla oviti viavo viayuva lociwe, lovilemba viavo locivava.

⁴⁸ Wa eca olongombe viavo kociwe, loviunda violohombo lolomeme koviliakulo viondalu.

⁴⁹ Wa va putuila onyẽno yaye ya tokota, locikumbiti loku tema kuenda elamba, haivo ocisoko colomunga vienyoleho.

⁵⁰ Wa sokiyila onyeño yaye onjila. Ka va popelele kokufa, puãi wa eca ovimuenyo viavo kefengi.

⁵¹ Wa ipa olonuñulu viosi ve Egito, aveli vavo volombalaka via Hama.

⁵² Omanu vaye puãi wa va tundisa ndolomeme, kuenje wa va songuila vekalasoko ndocunda.

⁵³ Wa va pitisa oko kua koka okuti ka va kaile lusumba. Okalunga puãi ka kupika ovanyali vavo.

⁵⁴ Wa va nena kofeka yaye yi kola, kuenda komunda eka liaye liondio lia huata.

⁵⁵ Wa lupula olofeka kovaso avo. Wa amula ocipiñalo cavo loseteko. Wa tungisa apata a Isareli kolombalaka viavo.

⁵⁶ Haimo lumue vo nyika nyika, va tamalala la Suku Tõlo. Ka va tẽlisile ovisila viaye.

⁵⁷ Puãi va tiukila konyima, vo lingila usuanji ndolosekulu viavo, Va lueya ndohonji ya yonga.

⁵⁸ Momo vo wenguila onyeño lolonumbuko viavo. Vo kokela esepa loviteka viavo via songiwa.

⁵⁹ Eci Suku a ci yeva wa tema, wa pañula olumue Isareli.

⁶⁰ Oco wa yanduluka otavernakulo yoko Silo, haiyo ombalaka a tungisa pokati komanu.

⁶¹ Unene waye wo weca kumandekua, lulamba waye peka liovanyali.

⁶² Omanu vaye wa va eca kosipata. Wa sukumuila ocipiñalo caye onyeño yaye.

⁶³ Ondalu ya lia akuenje vavo. Afeko vavo ka va muĩle ocisungo cuvala.

⁶⁴ Ovitunda viavo via kupuka losipata. Ovikuluwiya viavo ka via lilile.

⁶⁵ Oco Yehova a pasuka ndu wa pekelele otulo, ndocindululu ci kalukila ovinyu.

⁶⁶ Wa sandula ovanyali vaye. Wa va muisa efuki ka li pui.

⁶⁷ Wa likala ombalaka ya Yosefe. Ka nolele epata li Efarimi,

⁶⁸ wa nola puãi epata lia Yuda, lomunda Siono yina a sole.

⁶⁹ Wa tunga onembele yaye ndolomunda. Wa yi tumalisa ndongongo yi sevetiwa hũ.

⁷⁰ Wa nola Daviti ukuenje waye. Wo wupa kovimanga violomeme.

⁷¹ Wo wupa koku kuama olomeme via kala lomãla ha lingi ungombo wa va Yakoba, omanu vaye, va Isareli, ocipiñalo caye.

⁷² Oco wa linga ungombo wavo lutima wa sunguluka. Wa va songuila luloño wovaka aye.