OLOSAMO 77 - Embimbiliya - Bíblia Sagrada em Umbundu

Kusongui wolonjimbi. Elaka liaco, Jedutuni. Osamo ya Asafe.

¹ Mbilikiya Suku lolukandi. Mbilikiya muẽle Suku lolukandi okuti o njeva.

² Sandiliya Yehova eteke liohali. Uteke ngõlõla eka liange, si kavi. Utima wange ka u tava oku lembiwa.

³ Njivaluka Suku kuenje nokotelua. Sokolola kuenje utima u konyõha.

⁴ Ove o kolisa ovisokopia viange okuti si tẽla oku pata. Nda sakalala cimue okuti oku popia si ci tẽla.

⁵ Sinyanyeha oloneke viale. Njivaluka anyamo osiahũlu.

⁶ Uteke njivaluka ocisungo ndaimbaimba. Sokolola kuenje ñulihisa utima wange.

⁷ Yehova hẽ, o takumula ño-o hũ? Ka nundila vali he, olunda?

⁸ Ocisola caye ka ci pui hẽ, ca liweka? Lolohuminyo viaye hẽ, via imuha?

⁹ Suku he, oku linga ohenda kuo limba? Onyeño hẽ, ya tateka ocisola caye?

¹⁰ Cilo mopia siti, Ndimbuka loku sumua okuti eka liondio lia Tõlo lia pongoloka.

¹¹ Sinumula ovilinga via Yehova. Njivaluka ovikomo viove vionahũlu.

¹² Sokolola upange wove wosi. Sinyanyeha ovilinga viove vinene.

¹³ Onjila yove, a Suku, yi kola. Osuku yipi yi kuete unene ndowu wa Suku yetu?

¹⁴ Ove Suku ukuakulinga ovikomo. Ove wa tukulula ongusu yove pokati kolofeka.

¹⁵ Wa yovola omanu vove lokuokuo kuove okuti omãla va Yakoba la Yosefe.

¹⁶ Ovava a ku mõla, a Suku. Ovava a ku mõla, a kuata usumba. Alondo laovo a luluma.

¹⁷ Alende a sukumula ovava. Ilu lia kanala. Ovisongo viove via liakula kolonele viosi.

¹⁸ Ondaka yocilemĩlo cove ya kala vokati kocipepe. Olomanyula viove via liakuila koluali. Osi ya luluma, ya lisenga.

¹⁹ Alila ove a kala vokalunga, lolonjila viove kovava anene, haimo olomai viove ka via muiwile.

²⁰ Wa songuila omanu vove ndocunda, lovaka a Mose la Arone.