OLOSAMO 74 - Embimbiliya - Bíblia Sagrada em Umbundu

Osamo ya Asafe yoku sokoluisa.

¹ A Suku, o tu takumowaila nye? Nye onyeño yove ya tuimilila olomeme viusenge wove?

² Ivaluka omanu vove wa limuisa konahulu, haivo wa va yovola ha va lingi epata liocipiñalo cove. Ivaluka omunda Siono omu wa tunga.

³ Olomai viove vi loñe kalunda a enda ño-o hũ. Unyali wa nyõla cosi ca kala vocitumãlo cove ci kola.

⁴ Ovanyali vove va kalukila vokati konembele yove yi kola. Va kapako apandela avo ndolondimbukiso.

⁵ Va tetola apito lolondiaviti viavo ndomanu va timbula oviti.

⁶ Avaya ayo osi a luvikiyiwa va a nyõla londiaviti lolomatelo.

⁷ Va yoka ocitumãlo cove ci kola. Onjo yonduko yove va yi sawula loku yi papulula.

⁸ Va popia lovitima viavo, vati, Viosi tu vi nyõli olumue. Va yoka olonjo viosi viefendelo lia Suki vofeka.

⁹ Ka tu lete olondimbukiso vietu. Ka ku li vali uprofeto. Pokati ketu ka peli u wa kũlĩha osimbu yaco.

¹⁰ A Suku, toke pi unyali a tu fũkĩlisa? Unyali hẽ o lavisa ño-o hũ onduko yove?

¹¹ Nye o tiuwila eka liove? Nye o solekela eka liove liondio vonete?

¹² Haimo lumue, Suku eye Soma tunde konahũlu, haeye o yula yula kilu lieve.

¹³ Ove wa tepisa okalunga longusu yove, haive wa sasola ovitue viovimuandu vovava.

¹⁴ Wa nyanyõla ovitue via Canjangombe. Wo weca ha lingi okulia, kuoviendalomuenyo viovekalasoko.

¹⁵ Wa tola olono lolondui. Wa takatisa olondui ka vi takayata.

¹⁶ Utanya wove, uteke lawovo wove. Ove wa lulika osãi lekumbi.

¹⁷ Ovililo viosi violuali ove wa vi kapa. Wa sovola ondombo lokuenye.

¹⁸ Ivaluka, a Yehova, ndomo ovanyali va fũkĩlisa. Ofeka yaveke ya lavisa onduko yove.

¹⁹ Ku ka ece omuenyo wokanende kove kovinyama viovusenge. Ku ka ivale ovimuenyo violohukui viove oloneke viosi.

²⁰ Sumbila ohuminyo yove. Momo olohondongolo viofeka, vina vi kasi lowelema, vie yuka ovitumãlo via vakuakupunda.

²¹ Ava va talisua ohali ka va ka kutisue osõi. Olohukui lolosuke vi sivaye onduko yove.

²² Votoka, a Suku, somba ulonga wove. Ivaluka ndomo aveke a ku fuanguila eteke liosi.

²³ Ku ka ivaleko ondaka yovanyali vove, ndaño onjaya yava va ku katukila ndomo yi yevala ño hu.