OLOSAMO 73 - Embimbiliya - Bíblia Sagrada em Umbundu

ELIVULU LIATATU

Osamo ya Asafe.

¹ Ocili Suku o linga va Isareli ohenda, ava va yela vutima, o va linga ohenda.

² Ame puãi olomai viange via si oku sieluha. Okuenda kuange kua linga ndoku lipalanana.

³ Momo nda livela vakuakulituna eci nda mola esunju liolondingaĩvi.

⁴ Momo ka va yevi olongembia. Atimba avo a kuete ongusu ya suapo.

⁵ Ka va sakalala ndomanu vakuavo, pamue oku talisua ohali ndomanu vakuavo.

⁶ Oco okulituna kua linga ndolomota polosingo viavo, lundiandia u va sikilila nduwalo.

⁷ Ovaso avo a lenda loku neta. Ovitima viavo vi supoka levi viesanda.

⁸ Va tukayãla, va vangola lupombo. Va lituna kuenje va lipañela oku kangisa.

⁹ Va pisa ovailu lovimela viavo. Alimi avo a handeleka oluali luosi.

¹⁰ Oco omanu va va vanja loku va sivaya. Kokuavo ka va sangiko eko.

¹¹ Va linga vati, Suku o ci kũlĩha ndati? Tõlo hẽ o kuete ukũlĩhiso?

¹² Ota, ava olondingaĩvi, va pua esakalalo, va luisa ukuasi.

¹³ Ame, nda likavisa ño oku liyelisa vutima, loku sukula ovaka ange vesunga.

¹⁴ Momo eteke liosi nda yambuiwa. Nda longisua omele lomele.

¹⁵ Nda nda popele siti, Mopia ndoco, nda nda huvika ocitumbulukila comãla vove.

¹⁶ Puãi eci nda sokele oku kũlĩhisa ondaka yaco ya nangeleka enene,

¹⁷ te eci nda iñila vonembele ya Suku kuenje nda sokolola efulilo liavo.

¹⁸ Ocili, wa va tumbika oku kua sielena, wa va imba poku nyõleha.

¹⁹ Ocipikipiki va linga epile. Va liwa levi vi lingisa usumba.

²⁰ Va soka ndonjoi eci omunu a pasuka. Eci o pasuka, kuenje o va ivaluka, o va pembula.

²¹ Eci vutima mua tangeleka, okuti vokati mua suvala,

²² oco nda wulua enene, sia kũlĩhile cimue. Kokuove nda kala ño ndocinyama.

²³ Haimo lumue ñasi ño-o hũ love. Wa ñuata peka liondio.

²⁴ O songuila loku njimbaimba onumbi. Noke o nambula vulamba.

²⁵ Helie ñasi laye kilu, te ove? Lo kilu lieve ka ku li u nda yongola, te ove.

²⁶ Etimba liange lutima vi sekala, Suku puãi, ocikolo cutima wange, haeye ocikepa cange ka ci pui.

²⁷ Ocili, ava va kasi ocipãla love va taka. O nyõla vosi va ku lingila usuanji.

²⁸ Ame puãi, ciwa oku kala ocipepi la Suku. Nda nola Yehova Suku ha lingi ocikolo cange, okuti sapula ovilinga viove viosi.