OLOSAMO 72 - Embimbiliya - Bíblia Sagrada em Umbundu

Osamo ya Salomone.

¹ A Suku, longisa Soma oku tetulula lesunga liove. Longisa omõla osoma oku tetulula locili cove.

² A tetuluile omanu vove locili, lolohukui viove lesunga.

³ Esunga li muise omanu ombembua. Yi tunde kolomunda lokoviwũlu.

⁴ A linge onyima yolohukui. A popele olosuke. A nyõle ondiandia.

⁵ A kale lomuenyo osimbu yosi ekumbi li kasi, kuenda osãi, toke kovitumbulukila viosi.

⁶ A soke ndombela yi loka kowangu wa keluiwa, ndapengupengu a leñelisa osi.

⁷ Kovava aye esunga li amameko, lombembua yi lue toke osãi yimuha.

⁸ A viale tunde kokalunga toke kokalunga, tunde ko Lui toke kasukiyo oluali.

⁹ Ovanyãli vaye va petamele kovaso aye, lava vo suvuka va lese posi.

¹⁰ Olosoma via Tarsisi levi viovifuka vi u lambuile ulambu. Olosoma via Sieva la Seva vi nene ovivanda.

¹¹ Olosoma viosi vi u fendele, lolofeka viosi vi u vumbe.

¹² Omo o popela osuke eci yi vilikiya, ndaño ohukui lu ka kuete oñuatisi.

¹³ O kuatela ohenda ohukui losuke. O popela ovimuenyo violosuke.

¹⁴ O popela ovimuenyo viavio kundiandia lo kungangala. Osonde yavio kokuaye yi kola.

¹⁵ A kale osimbu lomuenyo. Vo wihe ulu woko Sieva. Omanu vo likutilile oloneke viosi. Vo pandole eteke liosi.

¹⁶ Vofeka mu kale olomema via lua. Vi hunge hunge kilu liolomunda. Ovaima ayo a soke lavo voko Levanone. Kovaimbo ku telehe omanu ndowangu wovisenge.

¹⁷ Onduko yaye yi kale hũ oloneke viosi. Ekemalo liaye li kale hũ ndekumbi. Omanu va likutilile oku sumũlũha ndeye. Olofeka viosi vi u tukule ukuesumũlũho.

¹⁸ Yehova Suku, Suku ya Isareli, a sivayiwe. Eye lika waye o lingainga ovikomo.

¹⁹ Onduko yaye yulamba yi panduiwe oloneke viosi. Oluali luosi lu yuke ulamba waye. Amene. Amene.

²⁰ Olohutililo via Daviti, omõla a Jese, via sula.