OLOSAMO 7 - Embimbiliya - Bíblia Sagrada em Umbundu

Ocisungo ca Daviti, a imbila Yehova, oku imbila Kusi u Benjamini.

¹ A Yehova Suku yange, mbunda kokuove. Silamele kuava va ndupuisa. Mopele.

² Sanga va suyulula ndohosi, loku ndia osimbu ka ku li u o popela.

³ A Yehova Suku yange, nda nda ci lingile, nda povaka ange pali eci ca penga;

⁴ nda nda muisile ekamba liange cĩvi, pamue nda nda pundile olivova unyali wange;

⁵ oco unyali a ndandule, a ñuate, a kosele omuenyo wange posi, a kape omuenyo wange voneketela.

⁶ A Yehova, votoka lonyeño yove. Katukila okufungula kuovanyali vange. Pasuka oku ñuatisa vekanga wa yalisa ale.

⁷ Pañinya olofeka okuti viu ku ongolokela. Tumala komangu yove kilu oku va tulamela.

⁸ Yehova ukuakutetuluila olofeka. Netuiluile, a Yehova, ndesunga liange, kuenda ndesunguluko ñasi lalio.

⁹ Uvi wolondingaĩvi wimuhe, olondingesunga puãi vi kolisa. Suku yesunga o seteka ovitima, levi vi kasi volonulo.

¹⁰ Otevele yange yi kasi la Suku, u o popela vakuavitima via sunguluka.

¹¹ Suku onganji yesunga, haeye Suku ukuakutema oloneke viosi.

¹² Nda omunu ka likekemba Suku o lepika osipata yaye. Wa lumbilila ale ohonji yaye kuenje ya tola.

¹³ Wangiliyavo ovimãlẽho viaye viokufa. Wa pongiya ovisongo viaye, olosungu viavio vi nina ndondalu.

¹⁴ Tala, ukuevĩho o sakalala loku cita ũvi. We mina evĩho, o cita uhembi.

¹⁵ O fẽla okueve, o kulungulamo. O kupukila vocitunu a fẽla.

¹⁶ Evĩho liaye li tiukila kutue waye muẽle. Okukangisa kuaye ku wila konumbutue yaye muẽle.

¹⁷ Njimbila Yehova olopandu via sesamela esunga liaye. Njimba ocisungo coku sivaya onduko ya Yehova Tõlo.