OLOSAMO 68 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti. Ocisungo.

¹ Suku a votoke, ovanyali vaye va sanduke. Ava vo suvuka va tile kovaso aye.

² Ndeci owisi u punguiwa haico o va pungula. Ndeci esela li yenguluka kondalu, haico olondingaĩvi vi nyõlehele kovaso a Suku.

³ Olondingesunga puãi vi sanjuke, vi uluile kovaso a Suku. Va yolele lesanju.

⁴ Imbili Suku ovisungo. Imbili onduko yaye ovisungo viesivayo. Imbili ocisungo u endela kalende. Onduko yaye Yehova. Uluili kovaso aye.

⁵ Isia yolosiwe, onganji yovimbumba, oco ca linga Suku vonjo yaye yi kola.

⁶ Suku o muisa ukuopongo epata, kuenje o songuila olohute kesumũlũho. Ava va sina puãi va tunga vekango.

⁷ A Suku, eci wa pita kovaso omanu vove, eci wa pita vekalasoko,

⁸ oco ongongo ya luluma, lilu lia lalula ombela eci Suku a moleha. Eci Suku, Suku ya Isareli, a moleha, omunda Sinai ya luluma.

⁹ Ove, a Suku, wa lokisa ombela ya lua. Wa kavuluisa ocipiñalo cove eci va kava.

¹⁰ Epata liove lia tungamo. Lohenda yove, a Suku, wa tekula olosuke.

¹¹ Yehova eca ondaka, lava va yi sapula valua, yiti,

¹² Olosoma viovita vi tila, vi tila. Akãi va siala volonjo va liavela evi via pundiwa,—

¹³ ndaño va siala oku tata oviunda violomeme,— avava opomba a lañiwa lopalata, lovonya ayo a lañiwa lulu u nina.

¹⁴ Eci Tõlo a sandula olosoma viofeka yaco, oneve ya loka ko Salimone.

¹⁵ Amunda yinene! Amunda ya Basiane! Amunde yolonumbuko vialua! Amunda ya Basiane!

¹⁶ Amunda yolonumbuko vialua, nye o vanjela locikupe omunda Suku a nola ha yi lingi ocitungilo caye, okuti omo Yehova a tumala oloneke ka vi pui?

¹⁷ Yehova wa enda lolohuluwa viakãlu, okuti olohũlũkãi kolohũlũkãi. Wa tunda ko Sinai kuenje weya konembele yaye yi kola.

¹⁸ Wa lamana omunda yisovi, wa ambata olomandekua. Wa tambula komanu ovivanda, ndaño komanu ava va sina, okuti Yehova Suku o tungako.

¹⁹ Panduli Yehova, u o tu ambatela ocilemo cetu eteke keteke. Suku eye eyovo lietu.

²⁰ Suku yetu Suku yeyovo. Ku Suku, eye Ñala, ku kasi apulu okufa.

²¹ Suku puãi o sasola ovitue viovanyali vaye. O sasola ocifuko cutue wu amamako lohõle yaye.

²² Yehova wa popia hati, Ha vopa ko Basiane. Ha vopa valondo okalunga,

²³ okuti vu yuisa olomai viene vosonde yovanyali vene kuenda okuti alimi olombua viene a molako ovikepa viavio.

²⁴ A Suku, awiñi vove va loña kefendelo, va muiwa, okuti awiñi va Suku yange, haeye Soma yange, eci va iñila vonembele.

²⁵ Vakuakuimba va pita kovaso, vakuakusika va kuamamo. Pokati kavo pa kala afeko va sika olopandelu.

²⁶ Ene wa tundi ketumu lia Isareli. Panduili Yehova Suku vekongelo linene.

²⁷ Kuli va Benjamini, haivo vatito oku va tenda. Ovo va songola. Kuli olosoma via Yuda lolosekulu viavo. Kuli olosoma via Sevulono, lolosoma via Nafitali.

²⁸ A Suku, pañinya upami wove. Ove wa tu kuatisile, lekisa ongusu yove, a Suku.

²⁹ Mekonda lionembele yove yi kasi vo Yerusalãi olosoma vi ku nenela ovivanda.

³⁰ Lemela ovinyama via wunda voloneva. Lemelavo owiñi wolonui lolonale via vakualofeka. Kosa lolomai ava va kuete ocipululu culambu. Sandula omanu va sole ovita.

³¹ Ke Egito ku tunde olomunga via Soma. Va Etiopia va yayuleko oku oluila Suku ovaka avo.

³² Imbili Suku ovisungo, ene alofeka violuali. Imbili Yehova ovisungo viesivayo.

³³ Eye endela kovailu, kovailu ana osiahũlu. Eye imba ondaka yaye, haiyo ondaka yomoko.

³⁴ Tukuili Suku upami. Ulamba waye u li ku Isareli. Upami waye u li vilu.

³⁵ Suku, Suku ya Isareli, vonembele yaye yi kola o lingisa usumba. O muisa omanu vaye upami lunene. Suku a sivayiwe.