OLOSAMO 66 - Embimbiliya - Bíblia Sagrada em Umbundu

Kusongui wolonjimbi. Ocisungo. Osamo.

¹ Uluili Suku, ene alofeka viosi,

² Imbi ovisungo viulamba wonduko yaye. Kemalisi esivayo liaye.

³ Popi la Suku hoti, Ovilinga viove vi koka cimue ocinjoko. Omo olohõlo viove via lua enene oco ovanyali vove va ku livondela.

⁴ Olofeka viosi vi ku fendela, vi ku sivaya lovisungo, vi imbila onduko yove ovisungo viesivayo.

⁵ Enjui, ndo tali ovilinga via Suku. Okulinga kuaye lomãla vomanu ku linga usumba.

⁶ Wa pongolola okalunga, ka linga osi ya kukuta. Va pita volui lolomãi. Omo tua yolelela

⁷ U o viala oloneke viosi lolohõlo viaye. Ovaso aye a lavulula olofeka. Ava va sina ka va ka lipandiye.

⁸ Panduli Suku yetu, ene amanu. Yevalisi ondaka yesivayo liaye.

⁹ Wa tu tumalisa ciwa lomuenyo. Ka tavele okuti olomai vietu vi sielũha.

¹⁰ Momo ove, a Suku, wa tu nyika. Wa tu nyika ndeci va nyika opalata.

¹¹ Wa tu fisa vonjanjo. Wa tu tuika ovitele vi lema kolonyima vietu.

¹² Wa pitisa vakuatuvalu kovitue vietu. Tua pita vondalu lo vovava. Haimo lumue wa tu nena oko kua yanja.

¹³ Njiya vonjo yove lovilumba vioku pia elisi. Hu tiuwila evi nda likuminya,

¹⁴ vina via tukuiwa lelimi liange, haivio omela wange wa popia eci nda sakalala.

¹⁵ Hu lumbila ovilumba vioku pia elisi vievi via netisua, kumuamue lowisi u tunda koku lumba ovitupi. Ha lumba olonui lolohombo.

¹⁶ Enjui, ndo yevi, ene vosi wa sumbi Suku. Ame sapula evi a ndinga.

¹⁷ Ndo vilikiya lolukandi kuenje elimi liange lio kemainya.

¹⁸ Nda nda selekele olohõle vutima wange, Yehova nda ka njevele.

¹⁹ Suku puãi wa njeva ocili, wa tava kondaka yohutililo yange.

²⁰ Suku a panduiwe omo ka pukuile ohutililo yange, pamue oku nimila ocisola caye ka ci pui.