OLOSAMO 60 - Embimbiliya - Bíblia Sagrada em Umbundu

Kusongui wolonjimbi. Elaka liaco, Suisani Eduti. Osamo ya Daviti yoku sokoluisa haiyo yoku longisa. Ya sovuiwa oku ivaluka ndomo a liyaka la Arame—Naharaime kuenda Arame Sova, leci Yoava, eci a tiuka, wa ipayela va Edome ekui lavivali kolohũlũkãi vocimbota comongua.

¹ A Suku, wa tu takumula, wa tu papulula. Wa tu temela. Tu tumbulule vali.

² Wa lulumisa ofeka, wa yi tendula. Tokeka apangu ayo momo yi li loku yokoka.

³ Wa muisa omanu vove evi via kãla. Wa tu nyuisa ovinyu vi tu vevengisa.

⁴ Ava va ku sumbila wa va iha epandela okuti, va li ongolokela eci va mõla ohonji.

⁵ Popela leka liove liondio. Tu tambulule, okuti ava va soliwa love va puluka.

⁶ Suku wa popia lokukola kuaye, hati, Nepaisa Siekeme, ngamula ocimbota ca Sukoti, kuenje ndi ci linga lesanju.

⁷ Gilati yange, Manase yange. Efarimi ombindikiyo yutue wange. Yuda epangati liange.

⁸ Moavi etasu liange lioku yuila. Ke Edome njimba oluhaku luange. Ngulula omo nda yula Filisiti.

⁹ O mitisa vimbo lia malehisua helie? O songuila ke Edome helie?

¹⁰ Kua tu takumuile he, a Suku? A Suku, ku tunda tunda vali lolohoka vietu.

¹¹ Tu kuatise oku yaka lovanyali vetu, momo okukuatisa kuomunu ka ku silivila.

¹² Eci Suku a kasi letu tu yaka lutõi. Eye o kosa ovanyali vetu.