OLOSAMO 59 - Embimbiliya - Bíblia Sagrada em Umbundu

Kusongui wolonjimbi. Elaka liaco, Ku ka nyole. Osamo ya Daviti yoku sokoluisa. Ya imbiwa eci Saulu a tuma oku lavekela konjo yaye ho wipaya.

¹ Mopele kovanyali vange, a Suku yange. Mbindikiye kuava va ñatukila.

² Silamele kolondingaĩvi. Mopele komanu vakuakupesela osonde.

³ Momo, tala, va lavekela omuenyo wange. Ovindululu via limungikila. Hakulueya kuangeko, pamue ekandu liange, a Yehova,

⁴ hakulueya kuangeko va lupukila, pamue oku lialekela. Ove muẽle, pasuka, ñuatise, loku ci vanja.

⁵ Ove muẽle, a Yehova Suku yolohoka, ove u Suku ya Isareli. Votoka oku yambula olofeka viosi. Ku ka kuatele ohenda olondingaĩvi via tumba ahãla usuanji.

⁶ Va tiuka oñolosi, va kukola ndolombua. Va ñuala ñuala vimbo.

⁷ Vakuakututuma kovimela. Va kasi lolosipata vovimela viavo. Va linga vati, O ci yeva helie?

⁸ Ove puãi, a Yehova, o va yola epembe. O fuanguila olofeka viosi.

⁹ Okuangusu yange, ove hu imba ovaso, momo ove, a Suku, vucikolo cange.

¹⁰ Suku yange o ñualẽhela lame locisola caye ka ci pui. Suku yange o mbanjisa eci ci wila kovanyali vange.

¹¹ A Yehova, atevele yetu, ku ka va ipaye sanga omanu vange va ivalako. Va sandola lolohõlo viove, va kupula.

¹² Mekonda liekandu liovimela viavo, okuti olondaka vialimi avo, va kuatiwile vonjanjo yepela liavo. Mekonda liupopi wavo woku siñala loku kemba,

¹³ va kundula lonyeño, va kundula, toke va puapo, okuti omanu vosi, toke kasukiyo oluali, va kũlĩha okuti Suku o viala vo Yakoba.

¹⁴ Va tiuka oñolosi, va kukola ndolombua. Va ñuala ñuala vimbo.

¹⁵ Va enda oko loko oku sanda okulia, kuenje va tema nda ka va sangi eci ci va kutisa.

¹⁶ Ame puãi, njimba ovisungo vioku tukula ongusu yove. Ocili, omele njimbila vilu ocisola cove ka ci pui. Momo wa linga ocikolo cange. Wa linga ocitililo eteke nda kala lotokua.

¹⁷ Angusu yange, hu imbila ovisungo viesivayo. Momo ove a Suku vucikolo cange, haive Suku o sole locisola ka ci pui.