OLOSAMO 55 - Embimbiliya - Bíblia Sagrada em Umbundu

Kusongui wolonjimbi. Cimbiwa kumosi lovisikilo viovikolo. Osamo ya Daviti yoku sokoluisa.

¹ A Suku, vonguila etui kohutililo yange. Ku ka tile elombelo liange.

² Njevelele, nambulule. Ndi limbaimba lohali yange.

³ Nda sakalaisua enene lonjaya yovanyali. Nda suvala loku kangisiwa lolondingaĩvi. Momo va ñokela ohali, kuenje va ñuatela ño ukuse locikumbiti.

⁴ Utima wa tokotelua vokati kange. Ocinjoko cokufa ca mbuila.

⁵ Usumba u ñuete loku luluma. Asangu a njitaila.

⁶ Nda linga siti, Nda nda kaile lavava ndopomba, nda nda palala si puyuka.

⁷ Ocili, nda nda ñuala ñuala kupãla, nda nda tumãla vekalasoko,

⁸ nda nda yayulako oku wunda si tila ofela yonupi.

⁹ Va nyõla, a Yehova. Tola alimi avo. Momo mola ungangala luyaki vimbo.

¹⁰ Utanya luteke va ñuala ñuala kovimbaka viaco. Evĩho longongo vi kasi vokati kalio.

¹¹ Enyõleho li kasi vokati kalio. Vocitanda calio ka mu puapua umunu lulimbiki.

¹² Hunyaliko o njola epembe. Momo nda oco nda nda ci tẽla. Umue wa suvuka heyeko wa ñangisa. Momo nda oco nda ndo salamela.

¹³ Ca kala puãi ove, wumunu wa lisoka lame, haive ukuetu, wukamba lia koleliwa.

¹⁴ Tua vangowaila pamuamue ciwa ciwa. Vonjo ya Suku tua kala kala pamosi locisola.

¹⁵ Okufa ku va sange ocipikipiki. Va sulumuhile lomuenyo vonjembo. Va ende locinjoko vayambo avo.

¹⁶ Ame puãi mbilikiya Suku, kuenje Yehova o mopela.

¹⁷ Loñolosi lomele lekumbi pongunji ndi litetela loku lisiõsiõla, kuenje o yeva ondaka yange.

¹⁸ O yovola lombembua omuenyo wange kocilunga ñasi laco, momo va lua va ñatukila.

¹⁹ Suku o kasi kocalo caye tunde ka ku ci, eye o njeva kuenje o va ketisa. Momo ka va pokola kovihandeleko, haivo ka va sumbi Suku.

²⁰ Ukuetu wõlõla eka liaye kuenje wa veta akamba vaye. Wa nyõla ukamba a livalele.

²¹ Upopi waye wa sielena ndongundi, vutima waye puãi mua kala uyaki. Olondaka viaye via leñela ca lua, ulela u sule, haivo puãi olosipata via somoha.

²² Tuika Yehova ocitele cove kuenje eye o ku kuatisa. Ualimue eteke o tava okuti ukuesunga o sengiwa.

²³ Ove puãi, a Suku, o lowisila vakuakupesela osonde kuenda olondimbiki vocitunu ca longa. Ka va mali ndaño onepa yoloneke viavo. Ame puãi hu kolela.