OLOSAMO 52 - Embimbiliya - Bíblia Sagrada em Umbundu

Kusongui wolonjimbi. Ocisungo coku sokoluisa ca soneha Daviti eci Doege u Edome weya ku Saulu kuenje wo sapuila hati, Daviti weya konjo ya Ahimeleke.

¹ Acindululu, nye o lipandelela uvi wa lingiwila vakuesunga? Eteke liosi o sovola ahãla unyõi.

² Okuakutumba ahãla unyõi, elimi liove lia soka lomoko yomuto ya lepikiwa.

³ O sole cĩvi, ciwa hacoko. O sole ca lua uhembi, oku popia esunga ci sule.

⁴ O sole olondaka viosi vioku lia vakuẽle. Elimi liove lie yuka ulimbiki.

⁵ Puãi Suku o ku ci nyõlela. O ku yelula, o ku upa vombalaka yove, o ku veyula kofeka ya vakuamuenyo.

⁶ Vakuesunga va ci mõla kuenje va kuata usumba. Vo yola, vati,

⁷ Tali omunu ka lingisile Suku ndocikolo caye, wa kolela puãi ukuasi waye wa lova. Ovipako viaye via linga ocitililo caye.

⁸ Ame puãi, nda soka luti woliveira utalala vonjo ya Suku. Ñolela ño-o hũ ocisola ka ci pui ca Suku.

⁹ Oloneke vi enda ño-o hũ hu panduila omo wa ci linga. Kovaso a vakuesunga sapula onduko yove momo yiwa.