OLOSAMO 5 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti, yimbiwa kumosi lolombendo.

¹ A Yehova, vonguila etui kolondaka viange. Yeva okulitetela kuange.

² A Soma yange, a Suku yange, yevelela kondaka nda vilikiya, momo kokuove ndi likutilila.

³ A Yehova, omele o yeva ondaka yange. Omele hu pongiyila ocilumba kuenje nalamela ekumbululo liove.

⁴ Momo haveko Suku o sanjukila evĩho. Umue wa vĩha ka tungi love.

⁵ Vakuakulipanda ka va talama kovaso ove. O suvuka vosi va lingainga evĩho.

⁶ O nyõla ava va popia popia uhembi. Yehova o nyehũla ongangala lukuelimbi.

⁷ Puãi omo ocisola cove ka ci pui oco calua, ame nyiñila vonjo yove, lomo hu kuetele esumbilo, metamela vonembele yove yi kola.

⁸ A Yehova, songuile vesunga liove mekonda liovanyãli vange. Suñamisile onjila yove kovaso ange.

⁹ Momo vimela viavo ka mu kuete esunga. Vovitima viavo evĩho lika li kasimo. Anguli avo ayambo upulule. Va veta veta ombambe lalimi avo.

¹⁰ Va pisa, a Suku. Va lilondoke volongombo viavo muẽle. Va tundisa omo olongole viavo via lua, momo va ku sinila.

¹¹ Vosi puãi, vakuakuwunda kokuove, va yolele. Va kaluke hũ lonjolela. Love, va silamela okuti ava va sole onduko yove va ku yolela.

¹² Momo ove, a Yehova, o sumũlũisa ukuesunga, haive u vindikiya lohenda ndotevele.