OLOSAMO 49 - Embimbiliya - Bíblia Sagrada em Umbundu

Kusongui wolonjimbi. Osamo ya va Kora.

¹ Yevi ondaka eyi, amanu vosi. Kululi ovatui, alonungi viosi violuali,

² ava vatito lava vanene, lolohuasi lolosuke kumuamue.

³ Omela wange u vangula olondunge. Okusokolola kutima wange ku loñoloha.

⁴ Mbonguila etui liange kolusapo. Nangulula ocitangi cange loku sika ohalupa.

⁵ Ñuatela nye usumba koloneke viohali, eci olohole viava va ñangisa vi ñuala?

⁶ Ava va kolela ukuasi wavo, va litambela okuliwewa kuovikuata viavo.

⁷ Lomue omunu o tẽla oku liyovola, ndaño oku iha Suku ocisembi.

⁸ Momo eyovo liomuenyo waye lia tĩla, kuenje lalimue eteke li soka,

⁹ okuti o kala lomuenyo ko pui, kuenje ka moli vali okufa.

¹⁰ Puãi o mola okuti ndaño vakualondunge va fa. Eveke lu wa wulua va nyõlehela pamuamue. Va sila vakuavo ukuasi wavo.

¹¹ Ayambo avo o-o a linga olonjo viavo vioku kalamo hũ, ha-o a linga ovitungilo viavo toke kovitumbulukila viosi, ndaño olofeka vi lukiwa lolonduko viavo.

¹² Ekemalo lialua tupu, omunu ka tumãla hũ. Wa soka lovinyama vi nyõleha.

¹³ Eli olio efulilo liava va kolela evi viesanda, hailio efulilo liava va sanjukila ovipako viavo.

¹⁴ Va tukuiwila konjembo ndocunda colomeme. Kufa eye ungombo wavo. Va sulumuhila veyambo kuenje ositu yavo yi nyõleha. Vonjembo, omo mu linga ocitumãlo cavo.

¹⁵ Suku puãi o yovola omuenyo wange ko njembo, momo o nambula.

¹⁶ Ku ka kuate usumba eci umue a linga ohuasi, leci ulamba wonjo yaye u lua.

¹⁷ Momo eci a fa lacimue enda laco. Ulamba waye ka u loka laye.

¹⁸ Ndaño o lipandiya kutima osimbu a kasi lomuenyo, kuenje ndaño o sivayiwa eci a salala,

¹⁹ haimo enda kepata liolosekulu viaye ka vi mõli vali utanya.

²⁰ Ndaño wa kemala calua haimo omunu ka tumãla hũ. Wa soka lovinyama vi nyõleha.