OLOSAMO 48 - Embimbiliya - Bíblia Sagrada em Umbundu

Ocisungo. Osamo ya va Kora.

¹ Yehova onene, haeye wa posokela esivayo lia piãla vimbo lia Suku yetu li kasi vomunda yaye yi kola.

² Ko Norte kupãla kuli omunda yi sovi Siono, haiyo ya posoka, haiyo imbo lia Soma yinene, kuenje ya linga esanju lioluali luosi.

³ Vovikolo vialio Suku wa lilekisa okuti eye ombindikiyo yocili.

⁴ Momo olosoma via liongolola, kuenje via li katukila.

⁵ Tuli via li mola haico via lisalukako, via yokoka enene, kuenje via tila.

⁶ Okululuma kua vi kuata, lolongembia ndukãi o cita.

⁷ O teya olonaviyu via Tarsisi lofela yokutundilo wekumbi.

⁸ Ndeci tua yeva yeva haico tua mõla vimbo lia Yehova Ukualohoka, vimbo lia Suku yetu. Kuenje Suku o li tumalisa ha li kala oloneke ka vi pui.

⁹ A Suku, tua sokolola ocisola cove ka ci pui vonembele yove.

¹⁰ A Suku, ndeci ci kasi onduko yove, haico esivayo liove li pitila kasulilo oluali. Eka liove liondio lie yuka eyulo.

¹¹ Omunda Siono yi sanjuke. Omãla va Yuda akãi va yolele, oku yolelela olonimbu viove.

¹² Ñuali ñuali Siono, li tokeki. Tendi olombonge vialio.

¹³ Kũlĩhisi ciwa ovimbaka vialio. Piti piti vovikolo vialio okuti vu lombolola kocitumbulukila ci kuamamo

¹⁴ ndomo Suku u eye Suku yetu oloneke vi enda ño-o hũ. Eye o linga usongui wetu otembo ka yi pui.