OLOSAMO 46 - Embimbiliya - Bíblia Sagrada em Umbundu

Kusongui wolonjimbi. Osamo ya va Kora. Ocisungo cimbiwa la vakuandaka.

¹ Suku eye ocikolo cetu haeye ongusu yetu. Eye oñuatisi, kohali o moleha lombili.

² Oco ka tu yokoka ndaño oluali lu pongoloka, ndaño olomunda vi undumuhila vokati kokalunga;

³ ndaño ovava aco a yuela, a tumoha; ndaño olomunda vi luluma lakimba aco.

⁴ Ku li olui omãla valuo va sanjuisa imbo lia Suku. Olio omangu yi kola yolonembele via Tõlo.

⁵ Suku yu vokati kalio, ka li sengiwa. Suku o li ohela omele ociteketeke.

⁶ Olofeka via kaluka, ovoviali a lisenga. Eye wa popia kuenje oluali lua yenguluka.

⁷ Yehova Ukualohoka o kasi letu, Suku ya Yakoba eye ocikolo cetu.

⁸ Enjui, ndo tali ovilinga via Yehova, alunda wa lingisa kilu lieve.

⁹ Imola ovita toke kesukiyo liongongo. O teya ohonji. O teta pokati onjelia. O yoka akãlu vondalu.

¹⁰ Liwekipo, limbuki okuti ame Suku, Ñemãla pokati kolofeka, ñemãla kilu lieve.

¹¹ Yehova Ukualohoka o kasi letu. Suku ya Yakoba eye ocikolo cetu.