OLOSAMO 45 - Embimbiliya - Bíblia Sagrada em Umbundu

Kusongui wolonjimbi. Elaka liaco Siosanimi. Ocisungo ca va Kora cokusokoluisa. Ocisungo cocisola.

¹ Utima wange u supoka lovisimilo via posoka. Mopia evi nda sovuila Soma. Elimi liange lia soka lopena yomunu wa ika oku soneha.

² Ove wa piãla omãla vomanu oku posoka. Komela wove kua sukumuhila unumbu, oco Suku wa ku sumũlũisila oloneke ka vi pui.

³ Anõi, maleha osipata yove kocikalo, lulamba wove lunene wove.

⁴ Seyako muẽle koku yula luwale wove. Yakela ocili. Vindikiya esunga. Eka liove liondio li ku longise evi vi lingisa usumba.

⁵ Ovisongo viove via tua vovitima viovanyali vosoma. Olofeka vi kupukila vemi liove.

⁶ Ocalo cove, a Suku, ci tumãla hũ oloneke ka vi pui. Epangati liuviali wove liesunga.

⁷ O sole esunga, o nyale evĩho. Oco Suku, eye Suku yove, a ku wavekela ulela wonjolela okuti o piãla vakuẽle.

⁸ Uwalo wove wa leha la mura la candala la kasia. Ovisikilo vi kasi vayemba olombinga vionjamba vi ku sanjuisa.

⁹ Pokati kakãi va ku vumba pa kala kala vonasoma. Kondio yove ku tai inakulu wa wala ulu wo ko Ofiri.

¹⁰ Yevelela, amolange. Sokolola. Vongola etui. Ivalako ofeka yene lonjo yaso.

¹¹ Oco osoma yi livela unumbu wove. Omo eye cime cove, u sumbila.

¹² Va Turo va ku tamba lolombanjaile. Ava va piãla kukuasi va ku livondela lovokuasi osi.

¹³ Nasoma vohondo yaye wa posoka cimue. Uwalo waye vo posuisa lalami ulu.

¹⁴ Eci vo songuila kosoma o wala uwalo wavala aiñi aiñi. Afeko vakuekuta liaye vo sindikila.

¹⁵ Va songuiwa lesanju lonjolela ha va iñila velombe liosoma.

¹⁶ Polosekulu viove pa piñala omãla vove. Va linga olombuale volofeka viosi violuali.

¹⁷ Onduko yove ndi yi ivaluisa kovitumbulukila viosi. Oco olofeka vi ku pandula oloneke ka vi pui.