OLOSAMO 43 - Embimbiliya - Bíblia Sagrada em Umbundu

¹ Netele onimbu yoku njovuisa a Suku. Sombele ondaka yange lomanu ka va sumbile Suku. Mopele kukuelimbi lokolondingaĩvi.

² Momo ove Suku wa linga ocikolo cange. Wa nakumuila nye? Nye ngendela loku lila omo unyali a ñeleketa?

³ Votola ocinyi cove locili cove, vi songuile, vi nuale komunda yove yi kola, lokonembele yove.

⁴ Oco ngenda kutala wa Suku, ku Suku ukuesanju liange lia piãla. Hu sivaya lohalupa, a Suku, a Suku yange.

⁵ Nye wa petamela, otima wange? Wa sakalaela nye vokati kange? Imba ovaso Suku, momo ndu sivaya vali. Eye oñuatisi yange, haeye Suku yange.