OLOSAMO 42 - Embimbiliya - Bíblia Sagrada em Umbundu

ELIVULU LIAVALI

Kusongui wolonjimbi. Osamo ya va Kora, yoku sokoluisa.

¹ Ndeci osonde yi livela olondui viovava, haico utima wange u ku livela, a Suku.

² Utima wange u kasi lenyona lia Suku, Suku ukuamuenyo. Eteke lipi njiya si moli ocipala ca Suku?

³ Lutanya luteke asuẽlela ange a linga okulia kuange, osimbu va popia ño lame utanya wosi, vati, Suku yove hẽ o li pi?

⁴ Njivaloka ovina evi osimbu vokati kange utima wa teka. Njivaloka ndomo nda endaenda lowiñi, haime nda va songowaila konjo ya Suku. Tua endaenda owiñi kolofesta vietu. Tua enda loku ulula loku imba ovisungo violopandu.

⁵ Wa petamela nye, otima wange? Nye wa sakalaela vokati kange? Imba ovaso Suku, momo ndu sivaya vali. Eye oñuatisi yange, haeye Suku yange.

⁶ Utima wa petama vokati kange, oco nda ku ivalukila kofeka ya Yordão, lo ko Hermone, lokokamunda ka Misare.

⁷ Elondo li vilikiya elondo lokuõla kuolomupa viove. Apuku ove osi lakimba a nuvika.

⁸ Haimo lumue Yehova utanya o muisa ocisola caye ka ci pui, luteke ndu wimbila ocisungo, haico ohutililo ku Suku yomuenyo wange.

⁹ Mopia la Suku, eye ocikolo cange, siti, Wa njivalela nye? Nye ngendela loku lila omo unyali a ñeleketa?

¹⁰ Ovanyali va fukĩlisa, huti ño osipata pokati kakepa ange, osimbu va popia ño lame vati, Suku yove hẽ o li pi?

¹¹ Wa petamela nye, otima wange? Nye wa sakalaela vokati kange? Imba ovaso Suku momo ndu sivaya vali. Eye oñuatisi yange, haeye Suku yange.