OLOSAMO 40 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti.

¹ Nda felevela ku Yehova lepandi, kuenje wa mbonguila etui, wa yeva okuliyula kuange.

² Wa njupa vocitunu cĩvi cĩvi, vocisave conata. Wa tumbika olomai viange kesenje, wa kolisa okuenda kuange

³ Wa ñapa vomela ocisungo cokaliye, haico cesivayo ku Suku yetu. Va lua va ci mola va kuata usumba, kuenje va kolela Yehova.

⁴ Omunu wa kolela Yehova, haeye ka sumbila vakuemande, ndaño ava va pambukila kuhembi, eye wa sumuluha.

⁵ A Yehova Suku yange, ovikomo wa linga, lovisimilo wa tu simila, via lua cimue. Lomue wa lisoka love. Nda nda sokele oku vi sapula loku vi vangula, nda ka ca tavele oku vi tenda, omo via lua enene.

⁶ Ovilumba vioku yoka levi violomema ku vi yongola. Wa situlula ovatui ange. Ocilumba coku pia elisi, leci cakandu, kua va silihile.

⁷ Oco nda linga siti, Tala, ndeya. Velivulu liovisonẽhua mua sonẽhiwila okuti,

⁸ Oku linga ocipango cove, a Suku yange, oco sanjukila. Ovihandeleko viove vi kasi vutima wange.

⁹ Nda sapula vekongelo linene ondaka yiwa yepopelo. Sia munihile omela wange, ndeci wa kũlĩha, a Yehova.

¹⁰ Siohilile ekuatiso liove lioku popela. Nda sapula ocili cove leyovo liove. Siohilile ocisola cove ka ci pui, locili cove, kekongelo linene.

¹¹ A Yehova, ku ka nimile ohenda yove. Ocisola cove ka ci pui, locili cove, vi silamele oloneke viosi.

¹² Momo ovitangi ka vi tendiwa via ñuala ocingonja. Olohole viange vi ñuete, si tẽla oku petula ovaso. Via lua enene, ocifuko cutue wange ci sule. Utima wange wa konyõha.

¹³ A Yehova, ndinge ohenda. Mopele. Yayulako, a Yehova, oku ngohela.

¹⁴ Ava va sanda omuenyo wange ha vo nyõli, va kutiwe osõi, va nyõlehele pamosi. Lava va livela okuti mbaluiwa, va tiuwiwe, va ketisue.

¹⁵ Lava va mopia vati, Co pepa, co pepa, va saluke losõi yavo.

¹⁶ Puãi vosi ava va ku sanda va yolele, va ku sanjukile. Lava va sole eyovo liove va popie oloneke viosi, vati, Yehova a kemainyiwe.

¹⁷ Ame puãi ndihukui, haime nda suka, haimo lumue Yehova o njivaloka. Ove uñuatisi yange, haive upopeli wange. Ku ka lende, a Suku yange.