OLOSAMO 4 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti, yimbiwa kumosi lovisikilo viovikolo.

¹ A Suku yesunga liange, nambulule eci mbilikiya. Wa mandulula eci nda kala lohali. Ndinge ohenda, yeva okulikutilila kuange.

² Ene amãla vomanu, toke pi ulamba wange u sepuiwa? Toke pi vu sola olondaka viesanda, loku sandiliya uhembi?

³ Limbuki okuti Yehova wa lisolekela ukuesunga. Yehova o njeva eci ndu vilikiya.

⁴ Kali lonyeño, puãi ko ka lingi ekandu. Sokololi lovitima viene eci vu kasi povola. Tũlũmuhi.

⁵ Lumbi ovilumba viesunga. Koleli Yehova.

⁶ Ku kasi va lua va livela vati, Nda ca tavele oku mola cimue ciwa! A Yehova, tu tuisile ocinyi cocipala cove.

⁷ Wa ñapa onjolela ya piãla vutima, onjolela yavo, eteke olomema lovinyu viavo vi lua, yi sule.

⁸ Mekela pula lombembua, mola otulo, momo ove, lika wove, a Yehova, o numalisa oko kua koka.