OLOSAMO 39 - Embimbiliya - Bíblia Sagrada em Umbundu

Kusongui wolonjimbi Jedutuni. Osamo ya Daviti.

¹ Nda linga siti, Ndi lava lutate ovituwa viange, okuti si lingi ekandu lelimi. Muniha komela osimbu olondingaĩvi vi nayilili.

² Nda linga ndocitende; ndoha; sia popele cimue, puãi ka ca kuatisile, ohali yange yovutima ya vokinyako ño-o.

³ Utima wa tokota vonulo. Osimbu nda sokolola, ondalu ya taima. Oco nda popia lelimi, siti,

⁴ A Yehova, ndongise efulilo liange, lokutendiwa kuoloneke viange ndeci ku kasi, kuenda omuenyo wange ndomo u pita.

⁵ Tala, oloneke viange wa vi sokisa lovopati ovaka. Oloneke viomuenyo wange kovaso ove hacimueko. Omunu wosi wa sokaño ndofela yoku fuima.

⁶ Ocili, omunu o ñuala ñuala ño ndocilelembia. Ocili, o likavisa ño loku sakalala. O lundika ukuasi, lu o kala lawo ka wi.

⁷ Kaliye, a Yehova, felevela nye? Ove nda ku imba ovaso.

⁸ Mopele kakandu ange osi. Ku ka tave okuti aveke va fukilisa.

⁹ Nda linga ndocitende, si asama omela, momo ove wa ci linga.

¹⁰ Ku ka njambule vali. Nda pua lokuveta kueka liove.

¹¹ Eci o yambuila omunu ekandu liaye o takatisa unumbu waye nda numbakaliyoke. Ocili, omanu vosi ofela yaño.

¹² A Yehova, yeva ohutililo yange. Vonguila etui kokulitetela kuange. Ku ka likale oku kumbuluila asuelela ange. Momo kokuove ndukombe, ndicingendelei ndeci ca kala votate.

¹³ Ku ka mbanje vali, oco ñolepo osimbu sia ile, kuenje si kasiko vali.