OLOSAMO 36 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti, ukuenje wa Yehova.

¹ Espiritu lĩvi li lungula ondingaĩvi vutima wayo. Ka yi kuete usumba wa Suku.

² Momo o lipandiyila vutima, hati, Ekandu liange ka li kũlĩhisua okuti li suvukiwa.

³ Olondaka viomela waye evĩho lelimbi. Wa liwekapo oku lunguka loku linga ciwa.

⁴ Eye ukuakusovola evĩho pula waye. Wa wila vonjila ka yiwako. Ka suvuka eci ca vĩha.

⁵ A Yehova, tunde posi toke kilu, kuosi kue yuka ocisola cove ka ci pui. Tunde posi toke kalende, kuosi kue yuka ocili cove.

⁶ Esunga liove lia soka ndolomunda via Suku. Olonimbu viove via soka ndelondo linene. A Yehova, ove o tekola omanu kuenda ovinyama.

⁷ A Suku, ocisola cove ka ci pui ca piãla enene. Omãla vomanu va wunda vundembo wavava ove.

⁸ Ve kuta esalalo lionjo yove. O va nyuisa kolui luesanju liove.

⁹ Momo ono yomuenyo yi li love. Kocinyi cove oko tu muila muila ocinyi.

¹⁰ Ocisola cove ka ci pui ci kale ño hũ lava va ku kũlĩha, lesunga liove lava va sunguluka kutima.

¹¹ Okulu kuemande ka ku ka mitile. Eka liondingaivi ka li ka ndupuise.

¹² Olondingaĩvi via leñuha, haivo via kupuiwa, oku votoka ka vi ci tẽla.