OLOSAMO 34 - Embimbiliya - Bíblia Sagrada em Umbundu

Osamo ya Daviti ya imbiwa eci a luvikiya uyui kovaso a Avimeleke kuenje Avimeleke wo tundisa okuti wa tila.

¹ Mandula Yehova oloneke viosi. Ñala ño-o hũ lesivayo liaye vomẽla.

² Utima wange u litambelela Yehova. Olohukui vi yevako kuenje vi yolela.

³ Va kemainye Yehova kumuamue lame. Tu pandiyili pamosi onduko yaye.

⁴ Nda sanda Yehova kuenje wa nambulula, wa mopela kovinjoko viange viosi.

⁵ Wimbili ovaso kuenje vu sanjuka, lalimue eteke ovipala viene vi nyumãla.

⁶ Ohukui eyi ya vilikiya, Yehova wa yi yeva, wa yi popela kovitangi viayo viosi.

⁷ Ungelo wa Yehova o ñuala ava vo sumbila ha va popela.

⁸ Seteki oco vu limbuke okuti Yehova ukuahenda. Omunu wosi o wunda kokuaye o sumũlũha.

⁹ Sumbili Yehova, alosandu viaye, momo ka ku li usuke kuava vo sumbila.

¹⁰ Omãla volohosi olonjanja va kamba eci va lia, kuenje va lambuka. Ava puãi va sanda Yehova lacimue ciwa va sukila.

¹¹ Amãla, enjui, njeveleli, oco ndu longisi oku sumbila Yehova.

¹² Omunu upi o yongola omuenyo, haeye o livela oloneke via lua ha moli evi viwa?

¹³ Lava elimi liove kevĩho; lomela wove okuti ko popi uhembi.

¹⁴ Kevĩho tundako. Linga evi viwa. Sandiliya ombembua, yi landula muẽle.

¹⁵ Ovaso a Yehova a vanja vakuesunga, o vonguila ovatui aye kevilikiyo liavo.

¹⁶ Ocipala ca Yehova ca temela olondingaĩvi, ha imula onjivaluko yavio kilu lieve.

¹⁷ Vakuesunga va vilikiya, Yehova wa va yeva, wa va popela kovitangi viavo viosi.

¹⁸ Yehova yu ocipepi la vakuavitima via teka. O popela ava va kasi lovitima via samba.

¹⁹ Ohali yukuesunga ya lua, puãi Yehova u popela kohali yosi.

²⁰ O lava akepa aye osi, lalimue li teka.

²¹ Evĩho li ponda ondingaĩvi. Ava va suvuka vakuesunga va pisiwa.

²² Yehova o yovola ovimuenyo viakuenje vaye. Lomue o wunda kokuaye o pisiwa.