OLOSAMO 31 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti.

¹ Kokuove, a Yehova, oko nda wunda. Ku ka tave okuti ñutiwa osõi. Mopele, omo o kasi lesunga.

² Mbonguile etui liove, mopele lombili. Ndingile ewe liocikolo, kuenda ombonge yoku mopela.

³ Momo ove uwe liange lia lepa, haive wucikolo cange, oco, mekonda lionduko yove, ngendise, songuile.

⁴ Omo ove wucikolo cange, njupe vowanda va nela uyombeki.

⁵ Ñundika peka liove espiritu liange. Ove wa njovola, a Yehova, a Suku yocili.

⁶ Ove o suvuka ava va sumbila ovina viaño viuhembi. Ame puãi ñolela Yehova.

⁷ Njolela, sanjukila ocisola cove ka ci pui. Momo wa mõla ohali yange kuenje wa limbuka otokua yange.

⁸ Kua ngecele peka liunyali. Wa talamisa olomai viange oku kua tanda.

⁹ Ndinge ohenda, a Yehova, momo nda suvala. Iso liange lia sueka loku lila, ndaño utima letimba, laviovo.

¹⁰ Momo omuenyo wange wenda ño-o loku lila, ovanyamo ange loku leña leña. Ongusu yange ya tepuluka mekonda liohali yange. Akepa ange a pekengua.

¹¹ Nda linga ocisepeleyi kolonjaki viange viosi, ca piãla ku vakuetu. Nda linga nonono yava va ñulĩha. Ava va ndetele vonjila va nila.

¹² Nda ivaliwa ndu wa fa, kovitima nda puako. Nda soka lelonga lia fa.

¹³ Njeva okuloñola kua valua. Kolonele viosi kuli eci ci yokokisa osimbu va numbika ongombo, loku tumba ehãla lioku nyeha omuenyo wange.

¹⁴ Ame puãi nda ku kolela, a Yehova. Nda linga siti, Ove wu Suku yange.

¹⁵ Oloneke viange vi kasi peka liove. Mopele kovaka ovanyali vange lo komanu va suvalisa.

¹⁶ Tuisila ocipala cove kukuenje wove. Mopele locisola cove ka ci pui.

¹⁷ A Yehova, ku ka tave okuti ñutisiwa osõi, momo nda ku vilikiya. Olondingaĩvi vi kutiwe osõi, vi uhile vonjembo.

¹⁸ Olomela viuhembi vi uhe, haivio vi lundila vakuesunga lepela lepembe.

¹⁹ Ohenda yove yalua cimue. Wa yi solekela ava va ku sumbila. Wa yi lingila ava va wunda kokuove kovaso omãla vomanu.

²⁰ O va wundisa vociwundilo cavava ove, oku va wundisila ahãla omanu. O va soleka vocikolo cove ca koka, okuti va tila uyaki walimi.

²¹ Yehova a sivayiwe, momo wa ñomohisa locisola caye ka ci pui eci nda suvala ndu o kasi vimbo lia ñualiwa ocingonja.

²² Eci nda sakalala nda popele siti, Nda takumuiwa kovaso ove. Puãi ove wa yeva okulikutilila kuange eci nda ku vilikiya.

²³ Soli Yehova, vosi ene alosandu viaye. Yehova o lava olondingocili, puãi o fetuluinya calua vakuakulituna.

²⁴ Kolisiko ene vosi vakuakuimba ovaso ku Yehova. Ovitima viene vi kuate utõi.