OLOSAMO 30 - Embimbiliya - Bíblia Sagrada em Umbundu

Osamo ya Daviti. Ocisungo cimbiwa eci va tumbika onembele.

¹ A Yehova, hu kemainya omo wa mbotola, kuenje kua tavele okuti ovanyali vange va njola epembe.

² A Yehova Suku yange, nda likutilila loku liyula kokuove okuti o ñuatisa, kuenje wa ñayisa.

³ A Yehova, ove wopa omuenyo wange vonjembo, haive wa numbulula loku njupa kuava va siala vonjembo.

⁴ Imbili Yehova ovisungo viesivayo, ene alosandu viaye. Panduili onduko yaye yi kola.

⁵ Momo onyeño yaye yi kala ño okacinimbu kaño. Ohenda yaye yenda ño-o hũ omuenyo wosi. Okulila ku iya oñolosi, omele puãi esanju.

⁶ Kotembo yesumuluho nda popia siti, Lalimue eteke sengiwa.

⁷ Ove puãi, a Yehova, lohenda yove wa numalisile komunda ya pamisua. Noke wa mbundisila ocipala cove, kuenje ovitangi via sanga.

⁸ Nda ku vilikiya, a Yehova. Nda likutilila ku Yehova, siti,

⁹ O mola nye kosonde yange nda nyiñila veyambo? Oneketela he, yi ku sivaya, yi lombolola ocili cove?

¹⁰ A Yehova, njeve, ndinge ohenda. A Yehova, ndingile oñuatisi.

¹¹ Okulila kuange wa ku pongolola oku cila. Wa ndulisa ocikelei, wa mbualisa onjolela, okuti

¹² utima wange u ku imbila ovisungo viesi vayo kuenje ka wuha. A Yehova Suku yange, oloneke viosi hu pandula.