OLOSAMO 29 - Embimbiliya - Bíblia Sagrada em Umbundu

Osamo ya Daviti.

¹ Ene avangelo, muisi Yehova, muisi Yehova ulamba lunene.

² Muisi Yehova ulamba wa posokela onduko yaye. Fendeli Yehova lokuposoka kuesunga.

³ Ondaka ya Yehova yi yevala kilu liovava. Suku yulamba wa lemila. Yehova yu kilu liovava akahandangala.

⁴ Ondaka ya Yehova yi kuete ongusu. Ondaka ya Yehova ya piãla kuwale.

⁵ Ondaka ya Yehova yi tola tola oviti violocedro. Ocili, Yehova o nyanyõla oviti violo-cedro via Levanone.

⁶ O tongelisa Levanone ndonale, kuenda Sirione ndomõla onyani.

⁷ Ondaka ya Yehova yi liakuisa ovilienge viondalu.

⁸ Ondaka ya Yehova yi lulumisa ekalasoko. Yehova o lulumisa ekalasoko lia Kadesi.

⁹ Ondaka ya Yehova yi citaisa olombambi, haiyo yi kolomõla ovasisi. Vonembele yaye ovina viosi vi linga viti, Ulamba.

¹⁰ Yehova o tumala kocalo caye oku viala etande. Yehova o tumala kocalo cusoma oloneke ka vi pui.

¹¹ Yehova a muise omanu vaye ongusu. Yehova a sumũlũise omanu vaye lombembua.