OLOSAMO 27 - Embimbiliya - Bíblia Sagrada em Umbundu

Osamo ya Daviti.

¹ Yehova eye ocinyi cange haeye epopelo liange. U njokokela helie? Yehova eye ongusu yomuenyo wange. Elie o ndingisa usumba?

² Eci olondingaĩvi vi ñatukila ha vi li ositu yange, olonjaki viange lovanyali vange ovo va likonjoka, va leñuha.

³ Ndaño olohoka vi nungila ocilombo cocingonja haimo utima wange ko kuata usumba. Ndaño ovita vi ñatukila haimo utima wange u tumala ño posi.

⁴ Cimosi nda lomba ku Yehova, oco sandiliya, ceci, cokuti ñala vonjo ya Yehova oloneke viosi viomuenyo wange, si tala tala unumbu wa Yehova, loku likutilila vonembele yaye.

⁵ Momo eteke liohali o salamisa vocilala caye. O mbundisa vociwundilo combalaka yaye. O numbika kewe lisovi.

⁶ Oco utue wange u tulikiwa kilu liovanyali va ñapa vocingonja. Ndumbila vombalaka yaye ovilumba vionjolela. Njimba ovisungo. Njimbila Yehova esivayo.

⁷ A Yehova, njeve eci mbilikiya lolukandi. Ndinge ohenda, nambulule.

⁸ Wa popia huti, Vanjiliyi ocipala cange. Utima wange wa ku tambulula wuti, Ocipala cove, a Yehova, ndi ci vanjiliya.

⁹ Ku ka mbundisile ocipala cove. Ove wa kala oñuatisi yange oco ku ka leñule ukuenje wove lonyeño. Ku ka nyinasi. Ku ka njanduluke, a Suku yepopelo liange.

¹⁰ Momo tate la mai va njanduluka puãi Yehova o nambula.

¹¹ Njimbe onumbi yelila liove, a Yehova. Songuile vonjila ya tapika, mekonda liava va ndavekela.

¹² Ku ka nelekale kocipango covanyali vange. Momo olombangi viuhembi via mbotokela, kuenje vi fuima fuima loviñali.

¹³ Ñolela okuti mola ohenda ya Yehova vofeka ya vakuamuenyo,

¹⁴ Imba ovaso ku Yehova. Kolisako. Utima wove u kuate utõi. Ocili, imba ovaso ku Yehova.