OLOSAMO 26 - Embimbiliya - Bíblia Sagrada em Umbundu

Osamo ya Daviti.

¹ Netele onimbu yoku njovuisa, a Yehova, momo nda endaenda loku sunguluka. Nda kolela Yehova, oku tatãla la naito.

² Ñulĩhise, a Yehova, seteke. Kũlĩhisa utima wange lovisimilo viange.

³ Momo ocisola cove ka ci pui ci kasi kovaso ange. Ngendaela vocili cove.

⁴ Si tumayala lolohembi. Oku enda la vakuelimbi si kuatako.

⁵ Oku kala kumosi lolondingaĩvi ndi ci suvuka. Sitava oku tumala la vakuakandu.

⁶ Ame sukula ovaka ange vesunga, kuenje ñuala utala wove, a Yehova.

⁷ Njimba lolukandi ocisungo colupandu, ndombolola ovikomo viove viosi.

⁸ A Yehova, sole onjo yove omu o tumayala, haimo mu kasi ulamba wove.

⁹ Ku ka ñombele kumue lolondingakandu. Ku ka nyõlele omuenyo wange kumue lava va pesela osonde.

¹⁰ Povaka avo pa kasi evĩho. Ovaka avo ondio e yuka ovitukiko.

¹¹ Ame puãi ngendaenda lesunga liange. Njovole, ndinge ohenda.

¹² Omai yange yi tai apa pa tapika. Sivayaila Yehova pokati kakongelo.