OLOSAMO 25 - Embimbiliya - Bíblia Sagrada em Umbundu

Osamo ya Daviti.

¹ A Yehova, kokuove oko nda petuila utima.

² A Suku yange, nda ku kolela. Ku ka tave okuti ñutisiwa osõi. Ku ka tave okuti ovanyali vange va nambela.

³ Ava va ku imba ovaso ka va ka kutiwe osõi. Vakuakutuila luvali va kutiwe osõi.

⁴ A Yehova, ndekise olonjila viove. Njimbe onumbi yalila ove.

⁵ Ngendise vocili cove loku ndongisa, momo ove Suku yeyovo liange. Nda ku imbila ovaso eteke liosi.

⁶ A Yehova, ivaluka ocisola cove ka ci pui lohenda yove, momo vi kasi tunde konahulu.

⁷ Ku ka ivaluke akandu ange utila, ndaño okulueya kuange. Njivaluke locisola ka ci pui mekonda liunu wove, a Yehova.

⁸ Yehova o kasi lunu lesunga, oco eye imba vakuakandu onumbi yonjila.

⁹ Ambombe o va endisila vesunga. Ambombe o va imba onumbi yonjila yaye.

¹⁰ Olonjila viosi via Yehova ocisola ka ci pui kuenda ocili kuava va lingainga ovisila viaye loku pokola kovihandeleko viaye.

¹¹ A Yehova, mekonda lionduko yove, ngecele ohõle yange, omo ya lua muẽle.

¹² Omunu upi o sumba Yehova? Eye imba omunu waco onumbi yonjila a nolapo.

¹³ Eye muẽle o salala, lomãla vaye va piñala ofeka.

¹⁴ Ukamba wa Yehova u kasi lava vo sumba. Ohuminyo yaye o va yi longaisa.

¹⁵ Nunguila ovaso ku Yehova oloneke viosi, momo eye o njupa olomai vonjanjo.

¹⁶ Niamele, ndinge ohenda, momo ñasi lupongo, ñasi lohali.

¹⁷ Ohali yutima wange ya lua. Mopele kohali yange.

¹⁸ Sokolola ongongo yange lelamba liange. Ngecele akandu ange osi.

¹⁹ Sokolola ndomo ovanyali vange va lua; lomo va suvuka lesuvu lia kãla.

²⁰ Lava utima wange, mopele. Ku ka tave okuti ñutisua osõi, momo nda wunda kokuove.

²¹ Esunga loku sunguluka vi silamele, momo nda ku imba ovaso.

²² A Suku, yovola Isareli kohali yaye yosi.